ISAYA 63 - AMÜSA BAIBEL (BSI)

Yanglihti Michah Abüdongba Akoh

¹ “Edom la Bozra yangdi lanü roba hi süo? Hitoi hechi moh jengkipü zii ko tasela roba hi süo? Hiba hi Abüdongba, khümchonung tase azeh, abi akoh züdenung rore.”

² “Cikih kangsohnung shükusih dhrümcho mohba kyo, tuepü abi jengki hitoi mohro?”

³ Abüdongba-nü lalingre, “Ihnü shükusih kyo yuchoti dhrümchiko ko Ih tronung süsü müro. I zichüro arüh dhrümnahcho, ko arüh shühnü I jengki apüm la münyiko.

⁴ I müyurü khümchonung becho chihkopü Ihnü dhrongchehko; arüh rorüh khingchinung akyang chihko.

⁵ I trorü süsü mülicho ngu Ih nyemüyangcho. Ta I rihlongnü I rezehsohcho, ko Ipunü akoh tsü ngucho.

⁶ I zichüro Ihnü yuchoti apüm dhrümnahcho ko arüh shühchicho. Ko Ihnü arüh akang shüh alih la tungpehcho.”

Abüdongba -nü Israelrü te Tsacho

⁷ Ihnü Abüdongba amüthrehba amüi nengdang yonung; Abi nguchi apüm nengdang Ihnü Abi sere. Abinü Israelrü khütang müwajücho, hütsü Abi yanglilüm ko Abi amüthrehba amüinü.

⁸ Abüdongba-nü yocho, “Arüh I müyurü; arühnü Ih mükiyohchünung.”

⁹ Hütsüta Abinü arüh chongcha apüm lanü arüh khümchocho. Hütsü ninglang riwürünü mah, ta Abüdongba apunü arüh khümchocho. Abi amüi ko dhsa lümba khu Abinü arüh khümchocho. Abinü atsichola lede arüh xüküm rocho.

¹⁰ Ta arühnü Abi nyüm yacho ko Abi Anbü Amüsa mükünyangsohcho. Hütsüta Abüdongba tsü arüh rorüh kangcho ko arüh nyüm khatacho.

¹¹ Ta hütsüpü arühnü atsichola Abüdongba dikehrü Mosa chichah lümchehcho, ko arühnü tsingdhingcho, “Kihdi lanü langnürüti khümchoba Abüdongba sü khülo? Mosa khyang Abi Anbü jüba Abüdongba sü khülo?

^12-13 Mosa khu Abi ziinü nguchi amülah nguchiba, kihdi changnah ko kih asoh khu Abi müyurü nücheh, apu nengdang müchangkaba nengse nguba Abüdongba tsü khülo?” Abüdongba-nü no arüh rangmü kuri kyo khodesü mümüthikehcho.

¹⁴ Misüti alihsu ngahlang nowücho kyo, Abüdongba-nü Abi müyurü khyang akyahshang jücho. Abinü Abi müyurü nücho ko Abi neng nengdang adhichi hirocho.

Yanglilüm ko Arüku nengdang Kihchicho

¹⁵ Abüdongba, ninglang Nü liba Amüsa ko ahechi la tsünü ihrü chah dhing. Ihrü nengdang lümba khüde liro? Nü zii khülo? Nü amüi ko dhsa lümba khüde liro? Ihrü mükhimücho tüpehjü.

¹⁶ Nüh ihrü au. Ihrü jümürü Abraham ko Jakob-rünü ihrü müdhingcheh, ta Nüh Abüdongba, ihrü au, Nühnü lede ihrü khümchore.

¹⁷ Tuepü ihrü Nü lang lanü thrümehsohcho? Tuepü ihrü hitoi hongzi Nü tenü za tsisohcho? Nü dikehrü khyanglangnü, lede Nü nyitsarüti khyanglangnü, thali rung.

¹⁸ Ihrü Nü Amüsa müyurü, azachah nengdang ihrü rorünü ihrü iipehko: arühnü Nü Amüsa kuh dhrümchiko.

¹⁹ Khodesü Nüh ihrü yangthsarü müthsacho roh-i, khodesü Nü nyitsarü müthsacho kyo, Nühnü ihrü bichicho.