ISAYA 62 - AMÜSA BAIBEL (BSI)

¹ Ihnü Jerusalem thsüchinung chonung; Abükyü mükhümchode Ih yah-a mülinung. Ko abükyü akoh tsünü amala dsi kyo vinung.

² Jerusalem, yanglihtinü nühnü kohcho ngunung. Yangthsarütinü nü ahechi ngunung. Nüh aneng asi khüdunü dsinung, Abüdongba apunü jücho aneng.

³ Nüh Abüdongba nengdang atsah atsa kuthri kyo linung.

⁴ Adelü nüte “Anbüchücho” müdsinung, mahkhang nührü lih te “Apehcho nitpü” müdsinung. Nü neng asi tsü, “Abükyü te Tsingrangba-nü longsüre” pü dsinung. Nü lih te, “Künyangseh kukangba” dsinung. Tunüo Abüdongba-nü nüte künyangchonü, ko nü lih te anii roh-i linung.

⁵ Dhrezarü khüdunü anitpü thsanung amüthsengcheh lazarü khyücho kyo, Sünü nüh thricho abinü nüh khyünung. Anii nü anitpü te künyangcho kyo, Tsingrangba-nü nüte künyangnung.

⁶ Jerusalem, nü tbü la Ihnü anyahrü yohpüle; Anyümong ko aromang arühnü sahmüthsa mülibae. Abüdongba te abi anyengchocho kepüchibae, Ko khodesü abinü arüh tünbüchüsoh.

⁷ Lihküpnü Jerusalem senungthsa yangdi khüdu külüp mükhyülide arühnü abi khyang akyahshang müjübae.

⁸ Abüdongba-nü yuchüm anyengchoba khüdu külüpko, ko Abi zii la hütsü Abinü nguchinung: “Nührü fürü tsü nührü rorüh tsangdhi müthsanung, ko shuparünü adelü nührü yongkha müyongnung.

⁹ Ta nührü sürünü shucho ko xacho, Arühnü tsang tsü tsunung ko Abüdongba senung. Nührü sürünü shükusih yuthsah laacho, arühnü I amübükuh la cikih tsü yongnung.”

¹⁰ Jerusalemrü, yangdi lanü chüdung, thali rorüh nü müyurü khyang lang pihjüng! Tungte lang pihjüng; lang tsü müsachehng! Yuchotinü tsüpsohnung amüdhethsa khüdu yohpüjüng.

¹¹ Abüdongba-nü limih apüm te züdere: “Abüdongba-nü nüh khümchonung tsehlepü, Jerusalem te young. Akhümchorüti Abi yola nüpü.”

¹² Nührü te “Tsingrangba Amüsa nyitsarü” dsinung, “Abüdongba-nü khümchoba nyitsarü.” Jerusalem te “Tsingrangba-nü müiba yangdi” dsinung, “Tsingrangba-nü müthrüchahchüpehba Yangdi.”