ISAYA 61 - AMÜSA BAIBEL (BSI)

Akhümcho Yusi Atsa

¹ AbüdongbaTsingrang nbü I chah lile, tunüo ailümrü yang yusi atsa thsingyunung. Lasih dhsa lirü kyangjünung, Kümyoh lirü müthehnung, Ko arangyoh la lirü nengdang nyüje sobhonung Abinü Ih müyühjü throchehcho.

² Abüdongba-nü Abi müyurü khümcho, Ko arüh rorüh kohnung. Abinü meshü lirü tbachisohnung akyang chihkopü sobhosohnung Abinü Ih müthehcho.

³ Zion la meshürü khyang alongri mülih akünyang ko alongphi, awah mülih anengse jünung nengdang. Arüh atümungnü yuje du nguchinung, ko abinü nguchicho ngang Tsingrangba nengsenung.

⁴ Anyahli thsangnyang liba yangditi arühnü külüpchinung.

⁵ I müyurü, shuparünü nührü dikehnung. Arühnü nührü kanglungrü xükümjünung ko nührü luh thsajünung ko nührü shükusih yo yuthsahjünung.

⁶ Ko nührü Abüdongba bebürü ko Tsingrangba dikehrüepü müdhenung. Nührünü yuchoti kuthsi tsunung, ko hütsü nührü yo kang künyangnung.

⁷ Nührü ashah ko awah changkako. Nührü palu lih la linung, ko nührü kuthsi anyüshinü alaa linung. Nührü akünyang achangka mülinung.

⁸ Abüdongba-nü yore, “Ihnü yujeba müire ko sehchiba afüashi thrünyire. Ihnü yuje cho I müyurü jiyünung ko arüh te müchangkaba azengchota khüdu külüpnung.

⁹ Yuchoti yola arüh anengkhong thsanung; arüh ngurü atümungnü arüh tsü Ihnü müwajücho nyitsarüepü müdhenung.”

¹⁰ Abüdongba nguchi nengdang Jerusalem-nü künyangre. Abükyü tsü kukangnung anüyohtpü jengkicho kyo, Tsingrangba-nü abükyü tsü akangcheh ko akohnü jengkijüko.

¹¹ Majüh kahrüp zicho kyo, Amichahba Abüdongba-nü müyurü khümchonung; ko yuchoti apümnü Abi senung.