ISAYA 60 - AMÜSA BAIBEL (BSI)

Jerusalem Aronung Ahechi

¹ Shemüsung, Jerusalem, ko nyü roh-i dhsang; Abüdongba ahechi nü chah hekehre.

² Apa yuchoti amarürahnü phatinung, Ta nü chah Abüdongba avisa hekehnung; Abi licho avisa tsü nüte linung.

³ Yuchoti Nü atsingse yang ronung, ko yangthsarüti Nü nyümong asi anyangnyü yang ronung.

⁴ Nü mükang tu tikehrünang dhingdhing: Nü müyurüti kulang ronung shibülungle! Nü tsurüti ashulanü ronung; Nü tsularüti akhungarü kyo dhinung.

⁵ Nühnü hi ngude akünyangnü jengnung; Nüh akünyangchonü dhridhrinung. Yuchoti kuthsi nüh yang hironung; Kihdi khüulangnü kuthsi hironung.

⁶ Ut atii chahnü shithsabhülehrü, Media ko Efa lanü ronung. Arüh Sheba lanü hon ko müchiji hipü ronung. Abüdongba-nü nguchicho yusi atsa tsü müyurünü yonung!

⁷ Kedar ko Nebaiot-rü san apüm Nüh yang kangmübüthsa hironung, ko Abüdongba künyangsohnung bholu chah mübünung. Abüdongba-nü Abi amübükuh akhulang tenü alaa ahechi keh külüpnung.

⁸ Hiri kihkuhti nyükhi kyo pha roba hi tuo? Mümüdhrü kulang thalirü kyo.

⁹ Arüh tsü ashu lih lanü roba kihkuhti lile, Tsingrangba müyurü kulang hirore. Arühnü hon ko taripi hirore Abüdongba neng dhichinung, Israel Amüsa Tsingrang. Abinü yucho atümung khyang Abi nyitsarü dhichisohre.

¹⁰ Abüdongba-nü Jerusalem te yore, “Shuparünü nührü tbü külüpchinung, Ko arüh yangthsarünü nührü dikehnung. Ihnü zichüro nührü khingchicho, ta ade Ihnü nührü te achomang ko yanglilüm ngusohnung.

¹¹ Anyümong ko aromang nührü tbükhüm khangthru linung, Ko yuchoti yangthsarütinü nü khyang kuthsi hirojünung.

¹² Ta Nüh müdikehba yuchoti riri changjünung.”

¹³ “Kee sing, Juniper sing ko cypres sing, Lebanon mürong lanü sing atsau; Nüh Jerusalem thsachinung hironung. I amübükuh atsah tsa külüpnung, I yangdi ahechikeh kangsohnung.

¹⁴ Nü sehchirü tsurüti ronung ko nü jingte mükhukehnung. Khüdupi nüh müchümükehrütinü nü jingte mükhukehnung. Arühnü nüte, ‘Abüdongba Yangdi,’ ‘Israel Amüsa Tsingrang yangdi Zion’ pü dsinung.”

¹⁵ “Adelü nüh müthrüchahchüpehnung ko müthrünyinung, Thrüchahchü pehjü liba yangdi. Ihnü nüh arangcheh ko atsah tsa külüpjünung, achangka müli akünyang müdüm khüdu.

¹⁶ Yuchoti ko yangthsarütinü nüh xükümnung, atpa khüdunü atsurü rükucho kyo. Ih, Abüdongba-nü nüh khümchocho nühnü müdhenung, Akohba Israel Tsingrang-nü nüh lehcheh müthehcho müdhenung.”

¹⁷ “Ihnü nü khyang imüyeng mülih hon hirojünung, Idhse ko sing mülih taripi ko imüyeng hirojünung. Ko lung mülih idhse hirojünung. Yangthsarütinü adelü nüh müsehchinung; Arühnü yuje ko yangtsa la yangthsasohnung.

¹⁸ Shüh khatoh yuva adelü müyuchinung; Achangbanü nührü lih thali müshüchinung. Ihnü tbü kyo nührü tsungtinung ko khümnung; Ihnü nührü khümchocho nengdang nührünü Ih senung.”

¹⁹ “Adelü anyümong nyü nührü atsingse müthsanung; Mahkhang amala chonu nührü atsingse müthsanung; Ih, Abüdongba nührü müchangkaba atsingse thsanung; I ahechi atsingse tsünü nührü chah henung.

²⁰ Nührü chongcha achangka khüdu ronung. Ih, Abüdongba nührü müchangkaba atsingse thsanung, chonu ko nyü tenü atsüp-u thsanung.

²¹ Nührü müyurü apümnü tu athsalang hütsü nguchinung; ko alih tsü arühtoh khyünung. Ihnü arüh khyümcho, Ihnü arüh thricho, Atümung te I dicho mishanung nengdang.

²² Nührü tsutpu azauba ko apohkiba mii, rezeh yucho toh-i kangnung. Khode akyang chihnang, Ihnü hi zah tikehsohnung. Ih Abüdongba!”