ISAYA 6 - AMÜSA BAIBEL (BSI)Isaya Dsicho 1 Yangthsaba Uzia süba kang, Ihnü Abüdongba ngucho. Abi yangthsaba pümji athseng ko dhikeh liba chah tsü pümcho ko Abi jengki tsünü Amübükuh apüm jengcho. 2 Abi thahte Serafim michang kanglungrüti yacho, ko arüh müipi aqo dhürüroh kehcho. Kanglungrü müipi tsü aqo anyünü aromih, anyünü ajing hapticho, ko anyünü mongchicho. 3 Arüh khüdunü khüdu te hita dsita yocho: “Amüsa, Amüsa, Amüsa! Akohbong Abüdongba tsü Amüsa! Abi ahechinü limih jeng lile.” 4 Arüh yuvanü Amübükuh akhengdi shühchicho ko Amübükuh tsü mikhunü jengcho. 5 Ihnü yocho, “I nengdang alongdi mühle! Ih ahohah, tunüo I be lanü chürocho yu apüm amünyi, ko amünyi du choba nyitsarü yola Ih lire. Ta, Ipu nahnü Akohbong Abüdongba, Yangthsaba tsü nguko.” 6 Hütsüde bholu chahnü michüh khüdu kamünyüpnü müjüp bipü, Serafim yola khüdu I yanglang mongcho jürocho. 7 Abinü michüh tsünü I bela thahpüpü yocho, “Hinü nü beküp chah thahpüko, ko ade nü mülang hitsiko, ko nü münyi mülang pehjüko.” 8 Hütsüde Abüdongba-nü yo Ihnü yuchicho, “Ihnü sü müthehnung? Ihrü nengdang sü wünung?” Hütsüde Ihnü yocho, “Ih hila lile! Ih müthehng!” 9 Hütsünü Abinü Ite wü müyurü te yusi hi yonung yocho: “Nührünü nyi du nyinye münyichehnung. Ko nührünü dhing du dhingnye müdhingchehnung.” 10 Hütsüpü Abinü Ite yocho, “Hiri nyitsarünü müngunung, müyuchinung mahkhang münyichehsohnung; hiri thoh lüsohng, arüh nangkhi tbengsohng, ko arüh nah tohsohng. Mahkhang arühnü Ih yang ximülanung ko arüh kyangnung.” 11 Ihnü tsingdhingcho, “Hi kyo khütoi nyahli linung, Abüdongba?” Abinü lalingcho, “Yangditi thsangnyang adeng mükangde, kuh tsü adeng mükangde, ko alih tsü riri müpehjüde. 12 Ihnü müyurü tsü ashula tsisohnung ko alih apüm pehsohnung. 13 Alih la tsü nyüh dhürela khüdu dusü nying linye, abisü changjünung; abi tsü repehcho langsing yahnbüh kyo linung.” (Ayahnbüh tsünü Tsingrangba müyurü asi dikehnung ngusohre) |
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
Bible Society of India