ISAYA 59 - AMÜSA BAIBEL (BSI)

Azikehrünü Müyurü Münyi Mülangjücho

¹ Nührü khümchonung Abüdongba khura sumüzeh mahkhang nührünü dsicho yuchinung khura nangtbenglepü tülüm!

² Hütsü nührü münyi khu Abinü nührü yu müyuchire. Nührünü Abi mübünung müküpde nührü münyi khu Tsingrangba tenü nührü zasohre.

³ Nührü arahkheh, shühkhatoh, ko müpsehba khu nührü mülangko.

⁴ Nührünü yukhajilang würe, ta nührü alanglang müngure. Nührünü khiyu tsü kohnung arahkhehchah dümpire. Nührünü bürü dhsakehjünung du lümchung chungre.

⁵ Nührünü rah amütsa külüpba tsü müyüh kehba mürü kyü kyole. Akyü tsü lahphohng, hütsülanü mürü chüronung!

⁶ Ta nührü rah tsünü nührü nengdang tu atsa müjünung, hütsü sherilanü akhyüchah müliba she rii kyahcho kyole!

⁷ Nührünü lede tu amütsanang hütsü du chungre, ko hütsü nguchinung müyingchehre. Nührünü achomükehrü khüdu müpsehnung mütütohnyünyehre.

⁸ Nührü wücho apümlang achangba ko athsangnyang du pehjüre, ko nührü rachichola süsü khümcho mühle. Nührünü nguchicho lüpcho amütsa du. Nührünü akureng langla tsehre ko hütsüba langla tsehrü süsü khümcho mühle.

Müyurünü Münyi Nyengchocho

⁹ Müyurünü yocho, “Tsingrangba-nü ihrü khingchirü khehlanü tuepü mükhümchoro ade ihrünü müdheko. Ihrünü avisala tsehnung khyünyücho, ta amarürah du licho,

¹⁰ ko ihrü anahtohrü kyo hümchi rachicho. Amala kyo, asülih amarürah asülih la kyo, nyüthungla mii ihrü jing müthicho.

¹¹ Ihrü nehcho ko wahcho. Ihrü khingchirü khehlanü ko thsameh lanü ihrü khümchosohnung Tsingrangba mükhyahcho, ta tu mütikeh.”

¹² “Abüdongba, Nüh nyüm ihrü mülang khütang lile. Ihrü münyinü ihrü mülangjüre. Ihrünü hütsü dee tsa müdhele.

¹³ Ihrünü Nüh nyüm yako, Nüh mükhyücho, ko Nü khanglang müiro. Ihrünü bürü sehchiko ko Nütenü za tsiko. Ihrü lümlong amükhyu ko ihrü yu arahkheh.

¹⁴ Yuje tsü iipehko, ko athsalang tsü amünyeh mürore. Yuje tsü müyurü bete müthikehre, ko athsalang tsü hütsüla lang mühle.

¹⁵ Yuje tsü müdsirachonü hütsü, yatide, apu uthring amütsarü kheh la züdure.” Abüdongba-nü hi nguko, ko yujeba müdsicho nengdang Abi mükünyangre.

Müyurü Khümchonung Küdangcho

¹⁶ Sehchi lirü sünüsü mütrocho ngu, Abi nyemüyangre. Hütsünü Abinü arüh khümchonung ko akoh tsü ngunung Apu zii bichinung.

¹⁷ Abinü yuje tsü khata jengki fükhüm kyo ko akoh tsü idhse kuthri kyo thrinung. Abinü athsalang nguchinyübanü jengkinung ko müyurü dhsasohba rühyangnung.

¹⁸ Abinü abi rorüh ashula lirü mii arüh aleng khingchinung.

¹⁹ Nyüchürolangnü nyüzüdu chii atümungnü Abi ko Abi zii amülah tsü drünung. Athotho yongkhi ko nyübong amülah kyo Abi ronung.

²⁰ Abüdongba-nü Abi müyurü te yore, “Nührü khümnung ko münyi lanü ximülarü apüm khümchonung Ih Jerusalem lang ronung.

²¹ Ko Ihnü nührü te azengchotaba khüdu külüpre: Ihnü lede nengdang nührü khyang I zii ko I adoba jüre, ko ade tinü nührünü Ite yochonyinung, nüh, nührü tsuzarü ko shümtsurüti tesü aronung shang apüm la I yochonyinung doung.”