ISAYA 58 - AMÜSA BAIBEL (BSI)

Yuje Kongba

¹ Abüdongba-nü yore, “Nührü kohchonü züdeing! I müyurü Israelrü te arüh münyi nengdang young!

² Arühnü I lang müdhenyü ko I yuzeng bichinyü nyümong müthe Ih mübüre. Arühnü Ih künyang mübünungthsa arüh khyang yujeba yuzeng tsü jüsohnyü yore.”

³ Nyitsarünü tsingdhingre, “Abüdongba-nü mümüdhekhang tuepü Ihsanü kongnung? Abinü mükhichikhang tuepü Ihsanü mütsuyongpü linung?” Abüdongba-nü arüh te yore, “Yuje tsü hi: nührünü khüulang kongde, khüulanglü nührü thsanyücho thsa nührü pohki nguchirü sehchire.

⁴ Nührü kongba tsünü nührü zichürosohre, ko nührünü khata yübütare. Hitari kongba ko dangkhidangnang Ihnü nyinungepü nührünü lümrü do?

⁵ Nührünü kongde, nührü jangjang chongchare; nührünü za yahlüpcho kyo nührü thah mükhurangre ko yüpjonung müyahshü khyangre ko tavi shure. Hita kongrepü yorü mah-o? Hitari te Ihnü künyangnungepü nührünü lümrü do?

⁶ “Ihnü khyünyüba kongba tsü hi: Bürü sehchiba ko arahba ixilih tsü pehng ko asehchirü tsü lehcheh müthehng.

⁷ Yangseh lirü te nührü tsuyongnung changtaang ko ailümrü kushirü mülirü khyang nührü kuh müsha yohpüjüng. Amüpinung mülirü khyang nührü shü jüng, ko nührübürü jünirü trotanung tüxükeh.

⁸ “Hütsütakhang, nührü chah I akünyang anyangnyü nyü kyo vinung, ko nührü madhsa zah kyangnung. Nührü khümchonung Ih nührü te lede linung; Ih nührü te liba tsünü apümlang nührü tsungtinung.

⁹ Nührünü kihchide, Ihnü lalingnung. Nührünü dside, Ihnü lengchonung. “Nührünü bürü sehchiba, bürü mülangjüba, ko yu amütsa choba hiri zahkhang;

¹⁰ yangseh lirü khyang yangtüpkhang ko chongcharü trokhang, nührü mükang liba amarürah tsünü nyüthung avisa kyo kangnung.

¹¹ Ko Ihnü lede nührü nyahnung ko atsanü nührü longxosohnung. Nührü tsayeng ko rezeh lisohnung. Nührü tsü kih thangchi liba tbü, khodesü münyehba kihna kyo linung.

¹² Anyahli trümnyang liba nührü kuphi ahi la tsü nührü nyitsarünü thali thsachinung. Nührü tsü tbü külüpchiba, ko athsangnyangcho kuh thsachibarü pü dangchinung.”

Sabath nyümong Bichicho Jiyü

¹³ Abüdongba-nü yore, “Nührünü Sabath nyümong tsü Amüsa roh-i bichikhang ko hütsü nyümong nührü thsanyücho müthsakhang; nührünü I Amüsa nyümong tsü, müshitseh, münguchi mahkhang amükhyu chonü mümünyisohpü dhichi bichikhang,

¹⁴ I dikehcho lanü roba akünyang tsü nührünü ngunung. Ihnü nührü lihküp la dhichisohnung, ko nührü jümürü Jakob khyang jüba lih la tsü nührü longnyüp lisohnung. Ih, Abüdongba-nü choko.”