ISAYA 57 - AMÜSA BAIBEL (BSI)

Israel Kyothri Mülangjücho

¹ Nyitsarü atsa süre, ko sünüsü münyichehre mahkhang mükhiyohre. Ta arüh süde, tu dhsürü nüsü arüh müdhsakehjüre.

² Sürü akang atsa liro, arüh atbachi ngure ko asübala kyahshangre.

³ Nührü münyirü, hila yukhanung rung. Nührü azi-amongrü, nahtrahnaxengrü ko shutsa-irü tenü tu atsau mah.

⁴ Nührü sü münyodhingro? Nührü arahkhehrü sü münyüjüro?

⁵ Nührünü hütsüri Amüsa singdong pohki mabomashi rii tsingrang mübüre. Nührünü yongkhi jüp lungkhi la nührü tsuzarü kangmübü jüre.

⁶ Hütsü lanü nührünü lung anana hiro tsingrang kangsoh mübüre. Nührünü hütsüri chah yongkha tungkehjüre ko tsang mübü mübüre. Hirila Ih künyangnungepü nührünü lümrü mah-o?

⁷ Nührünü kangmübü jünung azong athsengula küdure ko hütsüla mabomashire.

⁸ Nührünü nührü trahtri ying la kyothri müdongpüre. Nührünü Ih thrüchahchüpehko; nührünü nührü shü khohpehpü nührü müilarü te angang jüpü yüpnung arüh yüpjilang küdure. Ko hütsüla nührü mükhyamürah tsü longnyüpre.

⁹ Nührünü tuji ko axümlichi hipü Molek tsingrang mübünung würe. Nührünü mübünung tsingrang yangchi yuhirü alih changkalang, ko asülih chii yangchinung wüsohre.

¹⁰ Nührünü tsingrang apa yangchichonü nührübürü kyahre, ta nührünü khodesü müpehjüre. Nührü kyothri tsünü suhre jünungepü nührünü lümre, ko nührü khodesü sumüzahsohre.

¹¹ Abüdongba-nü yore, “Nührü drüsoh, hütsü khu Ite arahkheh cho ko Ih khüdupinü nbüchüpehsohba tsingrangti tsü sürüo? Ihnü anyahli rangchochonü nührünü Ih müdrüpehcho mah-o?

¹² Nührünü nguchiba tsü athsalangepü nührünü lümre. Ihnü nührü saying mishanung, ko nührü kyothrinü nührü mütrochehnung.

¹³ Nührünü arüku chingde, hütsüri kyothri tsünü nührü khümchosohng! Nyübongnü hütsüri fotsipehnung. Ta I chah longlangrüti alih la tsü linung ko I amübükuh la Ih mübünung.”

Arüku ko Akyangba Nyengchocho

¹⁴ Abüdongba-nü yore, “I müyurüti I yanglang thali rosohng. Arüh lang lanü athsungkyang apüm khyükhujüng! Lang pihjüng ko hütsü rungnümjüng!”

¹⁵ “Ih müchangkapü liba amichahba ko Amüsa Tsingrang. Ih amilang ko Amüsa müdümla lire, ta arüh longlangba ko arüh alongdi lisohnung, longlüm ko lasih thsamülaba müyurü yolasü Ih lire.

¹⁶ Ihnü I müyurü khyang akang jücho ko mütozah arüh mülangjünung mahkhang ledelü arüh te zii müchüronung.

¹⁷ Arüh münyi ko müxümüngucho ngang Ihnü arüh te zichürocho, ko Ihnü arüh khingchi thrüchahchüpehcho. Ta arühnü hongzi arühbürü langla du tsicho.

¹⁸ “Arühnü khüta nguchicho Ihnü nguko, ta Ihnü arüh kyangjünung. Ihnü arüh nünung ko tronung, ko me trarü Ihnü tbachijünung.

¹⁹ Ihnü ashu ko amünyehla lirü atümung khyang yangtsa jüre! Ihnü I müyurü kyangjünung.

²⁰ Ta amütsarü tsü athrünyi zeh roba, müngukaba kiloh ko mükyahshangchehba kihdi kyo lile.

²¹ Münyirü nengdang atsikehchah mühle” pü Abüdongba-nü yore.