ISAYA 56 - AMÜSA BAIBEL (BSI)

Yuchoti Apüm Zehnung

¹ Abüdongba-nü hita yore, “Tu yuje ko athsalang hütsü du nguching, tunüo tunyah mülipü Ihnü nührü khümchonung.

² Sabath nyümong müthsangnyangpü yohpürü Ihnü müwajünung. Sürünü amünyi mübichiro Ihnü arüh müwajünung.”

³ Shuparü Abüdongba müyurü yola zehrünü hiroh-i tücho, “Abüdongba I müyurü yola mümübüsohnung.” Axangmicho nyitsarünü abinü tsuzarü linung mükohchonü, abi Tsingrangba nyitsarü mükangchehnungepü khodesü tülüm.

⁴ Abüdongba-nü hitari nyitsarü te yore, “Nühnü Sabath nyümong müsa yohpo Ih hechikhang ko Ihnü künyangnungthsa nguchi ko azengtacho yuje yohpükhang,

⁵ nü neng I amübükuh ko I müyurü yola nü tsuzarü licho tenü ashengu lümkehnung. Khodesü nüh münbüchünung.”

⁶ Ko Abüdongba-nü shuparü Abi nyitsarü yola zehrü, sürünü Abi müiro ko Abi dikehro, sürünü Sabath nyümong müsa ko azengtacho yuje cho yohpüro arüh te yore:

⁷ “Ihnü nührü I Amüsa Khang Zion, lang noronung, I dangkhidangnang kuh la I akünyang jünung, ko I bholu chah nührünü mübüba kangmübü khyüchonung. Ko I kuh te yucho apüm nengdang dangkhidangnang kuh pü dsinung.”

⁸ Akohba Abüdongba, sünü Abi nyitsarü Israelrü yangtsilangnü norocho, Abinü aparüsü arüh yola zehsohnung noronungepü nyengchoko.

Langnürüti Mülangjücho

⁹ Abüdongba-nü yucho parü te rangmü kanglungrü roh-i ro Abi nyitsarü münyünung yoko.

¹⁰ Abinü yore, “I müyurü müzahsohnung liba langnürüti apüm nahtohko. Arühnü tu mümüdhe. Arüh tsü mühungchiba füza kyo lile, arühnü yüpjoko melang du lire. Khüta hitoi yüpnyüro!

¹¹ Arüh tsü khodesü mi müjengba müramüro füza kyole. Hiri langnürüti anyichehba mühle. Arüh apümnü palu thsanyücho thsare ko abürü nengdang du lümre.

¹² Hiri amücharütinü yore, ‘Ihsanü yongkha hiro akohcho yongnung! Atu tsü chünye tenü atsau thsanung!’”