ISAYA 55 - AMÜSA BAIBEL (BSI)

Tsingrangba Yanglilüm Jücho

¹ Abüdongba-nü yore, “Rung, axorü apüm; hila kih lile! Rung, nührü thsi mülirü— tsang lihng ko tsung! Rung yongkha ko nyikih lihng, nührü te angang mükhyünung!

² Longmüxoba nengdang tuepü thsi pehro? Tuepü nguchipü yangseh liro? Iyu nyieng ko Ihnü yocho roh-i nguching, ko tsuyongnung atsauba nührünü tsunung.”

³ “Ade hi nyieng, I müyurü, ko I yanglang rung; I yang rung, ko nührü akang ngunung! Ihnü nührü te müthsangnyangba azengchotaba khüdu külüpnung ko Ihnü David te nyengchocho amüwa nührü khyang jünung.

⁴ Ihnü abi yuchoti michah langnürü ko anüchirü kangsohcho, ko abi khu arüh te I zii ngusohcho.

⁵ Ade nührünü shuparü dsinung; khüdupi arühnü nührü mümüdhecho, ta ade arühnü nührü yola zehnung shang ronung! Ih, Abüdongba nührü Tsingrang, Israel Amüsa Tsingrang-nü hiri apüm tikehsohnung; Ihnü nührü khyang adhichi ko ahechi apüm jünung.”

⁶ Abüdongba yangching Abi ngunungthsa lide, Abi amünyethsa lide Abi te dsieng.

⁷ Amütsarünü arüh lang pehjüsohng, ko arüh lümlong mülihchisohng. Arühnü Abüdongba, Ihsa Tsingrang yang ximülasohng; Abi yanglilüm ko zah mülang pehjüba.

⁸ Abüdongba-nü yore, “I lümlong tsü nührü lümlong roh-i mah, ko I lang tsü nührü lang tenü pa lile.

⁹ Alimih tenü ning khütoi thseng liro, hütsüta I lang ko lümlong nührü tenü athsengu lile.”

¹⁰ “Iyu tsü alih khyang kih jünung ninglangnü tsing ko shurü roba kyo lile. Arühnü tsahma zisohre ko majüh thsanung ko atsunung sihsohre.

¹¹ Ihnü choba yu tsüsü hütsü kyo linung— Ihnü tu lümchung chungro hütsü tikehnung; tu nguchinung müthehro lüpcho hütsünü nguchinung.”

¹² “Nührü akünyangnü Babylon pehjünung; yangdila tsünü yangtsa la nührü nücheh tsinung. Akhang azongnü yuva chüro khi thsanung, ko singdongtinü akünyangnü khongnung.

¹³ Ade zeng lichola cypres sing zinung; Zengtrung mülih mertel sing chinung. Hiba hi achangka mülinung amüdhethsa, Ih, Abüdongba-nü nguchicho lümkehnung.”