ISAYA 54 - AMÜSA BAIBEL (BSI)

Israel nengdang Abüdongba Amüi

¹ Jerusalem, nüh pümdongcho khingkurü kyo liroko, ta ade nühnü akünyangnü khi züde thsaang. Adelü axengcho khingkurü tenü nühnü tsuzarü adrongu nümüsunung.

² Nü liba shükuh tsü adiu kangsohng; rangdüshü tsü zingsheng ko aja tsü drengdrengsohng.

³ Apümlang lurü nühnü jasohng; ade bürü kheh la liba lih tsü nü nyitsarünü thali ngunung. Ade pehjü liba yangditi tsü nyitsarünü jengnung.

⁴ Tüdrü, nüh thali ashah mükhyüsohnung; nüh mükhimüngu müthsanung. Nühnü kusithrilarü kyo yuje mücho, ko chomilarü kyo nü lümtoh nbüchünung.

⁵ Nü külüpbong tsü nü nii kyo linung, Akohba Abüdongba tsü Abi neng. Israel Tsingrang-nü nüh khümchonung, Abi limih apüm yangthsaba.

⁶ Israel, nüh kusithrilarü aniinü pehjüpü longriseh lirü kyole. Ta Abüdongba-nü nüh dsili yore:

⁷ “Ihnü nüh azachah pehjücho; müisehnü nüh khyülire.

⁸ Azachah nengdang du zichüro pehjüpü tsicho, ta Ihnü lede nengdang I amüi nüte ngusohnung.” Hütsüta nüh khümchoba Abüdongba-nü yore.

⁹ “Noa chichah thali limih chah kihmülüm mürosohnung Ihnü nyengchocho. Ade nüte thali zii müchüronung Ihnü nyengchore; Ihnü nüh müyübünung mahkhang mükhingchinung.

¹⁰ Akhang ko azong trümnahnung kohle, ta nüte I amüi khodesü müchangkanung; Ihnü nyengchoba yangtsa lede linung.” Hütsüta nü müiba Abüdongba-nü yore.

Aronung Jerusalem

¹¹ Abüdongba-nü yore, “O Jerusalem, nüh achongcha, atrorü müliba yangdi, atbachijürü khüdusü mühle, Ihnü akhengdi tsü thsidi lungnü külüpchinung.

¹² Ihnü nü rangrangkuh tsü thsidilung amohnü thsajünung, tbükhüm tsü michang kyoba lungnü, ko nührü mükang tbü tsü thsidi lungnü tbüjünung.”

¹³ “Ipunü nü nyitsarü te donung, ko arüh khyang yangtsa ko amüwa jünung.

¹⁴ Yuje ko amüsanü nüh drengdrengsohnung, sehchiba ko adrü lanü nüh khümchonung.

¹⁵ Khürünü nüh bekhang, hütsü Ite mütsingpü nguchire; Sünü nüte khatanang abi khülunung.”

¹⁶ “Michang thsa thsunohrü kengba ikengrü tsü Ihnü thricho. Thsunohrü bichirü rothsarüsü Ihnü thricho.

¹⁷ Ta tu thsunohrünü nüh müdhsakehnung, nü mülangjürü atümung te nüh alalingba linung. Ihnü I dikehrüti khümnung ko akoh jünung.” Abüdongba-nü choko.