ISAYA 53 - AMÜSA BAIBEL (BSI)

¹ Müyurünü lalingcho, “Ihrünü ade yoba tsü sünü yudsinung? Sünü hila Abüdongba kheh ngunung?

² Abi dikehrü alih kung la ara ra zinung tsü Abi lümcho thsacho. Ihsanü abi dhingchehnungthsa, abi chah jengreng mahkhang tsahtsa adhingnung mükehcho.

³ Ihsanü abi mükhimünguko ko abi mükhyücho; abinü chongcha ko adhsa rangko. Sünüsü abi chah adhing mii müdhingkeh, abi tulamüyoh kyo Ihsanü abi mükhimünguko.”

⁴ Ta Ihsanü hinung chongcha abinü hiko, Ihsa adhsa abinü hiko. Abi chongcha tsü Tsingrangba chahnü akhingchiepü Ihsanü lümcho.

⁵ Ta Ihsa münyi ngang abi lerohpehcho, Ihsanü amütsa nguchicho ngang abi chah xüpcho. Abi khingchicho ngang Ihsa kyangko, abi chah xüpcho khu Ihsa kyangcho.

⁶ Ihsa apüm chahpehba san kyo licho, Ihsa apüm palu tsinyülang tsiko. Ta Ihsa aleng akhingchi tsü, Abüdongba-nü abi chah tikehsohcho.

⁷ “Abi chah dee mütsa bichicho, ta longlüm rangchocho; abinü yu tpah-o mii mücho. Müpsehnung liba sanza khüdu kyo, ko anbüh müjüprü bete yuva müchüroba san kyo abinü abe mükhangthrucho.

⁸ Abi rangcho ko mülangjüpü süsohnung hiwücho, ta sünüsü abi mütro. Ihsa münyi ngang abi süsohcho.

⁹ Abi amütsarü yola kong la yohpücho, abi alirü yola dhrürangcho; abinü khodesü amütsa münguchinye, mahkhang arahkheh müchonye.”

¹⁰ Abüdongba-nü yore, “Abi chongchanung tsü I lümcho; abi süba tsü mülang pehba ngunung kangmübü licho. Hütsüta abinü abi shümtsurü ngunungthsa; kutsüp linung, ko abi khu I lümcho tikehnung.

¹¹ Chongcha akang khanglang, abi akünyang thali ngunung; abi adeng la müchongcha pü abinü müdhenung. Longlangba I dikehrü, sü chah I longxore, abinü adrong akhingchi hinung ko abi khyanglangnü Ihnü arüh mülangpehjünung.

¹² Hütsüta Ihnü abi khyang adirü ko amüdherü yola adhichi jingdrang jünung. Abinü künyangseh abi akang jücho, ko amütsarü suro changtacho. Abinü adrong münyi hicho, ko arüh khyang mülang pehjüng pü kihchijücho.”