ISAYA 48 - AMÜSA BAIBEL (BSI)

Tsingrangba tsü Aronung Shang Abüdongba

¹ Hi nyieng, Israelrü, nührü Juda chahnü trahchochoti: Nührünü Abüdongba nengla yuchümre, ko Israel Tsingrang mübürepü yore, ta nührünü choba yu kyo münguchi.

² Ko nührünü nührü tsü amüsa yangdi surokhungepü müthseh chore, ko Israel Tsingrang Akohba chah dümpirepü chore.

³ Abüdongba-nü Israelrü te yore, “Papadenü Ihnü atikehnung hi choyohpü licho; ko dhrongyengnü Ihnü hütsü tikehsohre.

⁴ Nü hongzinung Ihnü müdhejungcho, idhse ko imüyeng kyo azi.

⁵ Hütsünü papadenü Ihnü nü akang shulüm choyohcho, mütikeh-edenü sobhocho, hütsüri nührü kyothritinü tikehsohchoepü müchosohnung nengdang.”

⁶ “Ihnü choyohcho apüm ade tikehko; Ihnü choyohba tsü yuje-epü nührünü nyengchoung. Ade Ihnü bekhulang mümishacho atikehnung asi nührü te yonung.

⁷ Ade du Ihnü hütsüri tikehsohre; atsichola hi kyo mütikehdhing. Tikehpü lirelang, hütsüri apüm müdhe lichoepü nührünü yonung.

⁸ Nührü chah long mülangcheh pü müdhejungcho, tunüo lede nührü tsü anyümrü thsacho. Hütsü khu nührünü khodesü müyuchicho, tunüo adikehtinü nührü nangkhi tbengcho.”

⁹ “Müyurünü I neng sesohnung, Ihnü I zii linga la nyehtire; Ihnü hütsü yohpülire ko nührü müchangsohnung.

¹⁰ Michang la taripi tahchehcho kyo, michang chongchala Ihnü nührü thsadsüdhingko. Ta nührü amii mühlepü Ihnü müdheko.

¹¹ Ihnü tu nguchicho hütsü Ipu nengla, Ihnü I neng müchühsohnung mahkhang I müleng yo thsanungba ahechi tsü sütesü müchangtanung nengdang.”

Cyrus, Athrochehcho Langnürü

¹² Abüdongba-nü yore, “Iyu nyieng, Israel, Ihnü dsichehba müyurü! Ih Tsingrang, adikeh, achangka Tsingrang khung!

¹³ I khehnü alih akhengdi külüpcho ko ning lehchehcho. Ihnü ning ko alih dside, arühnü khüdupinü ro yare.”

¹⁴ “Shimükhong ko nyieng, nührü apüm! Ihnü throchehba nyitsarünü Babylon mahnung tu tsingrangnüsü müchoyoh; Ihnü tu yoro, abinü nguchinung.

¹⁵ Abi te chotaba ko dsiba tsü Ih; Ihnü abi nüchehcho ko akoh jücho.”

¹⁶ “Ade Ih shündhün rung ko Iyu nyieng. Adikeh lanü Ihnü misha yoko, ko Iyu lede tikehsohre.” (Ade Akohba Tsingrang-nü tase jüpü Ih müthehcho)

Müyurü nengdang Abüdongba Lümchung

¹⁷ Israel Amüsa Tsingrang, nührü khümchoba Abüdongba-nü yore: “Ih nührü Tsingrang Abüdongba, Abinü nührü tsanung nengdang donyüre, ko nührü wünung lang thongunyüre.”

¹⁸ “Nührü dunü Iyu nyirelang! Amüwanung münyehba yongna kyo pohba thsako. Kih la kiloh rocho kyo, nührü yang akoh roba thsako.

¹⁹ Nührü chahnü lihpi kyo mükhilong trahcho, ko arüh khodesü müchangnungthsa Ihnü külüpjüpü liba thsako.”

²⁰ Babylon lanü tsicheh tsieng; yusi tsü künyangnü züdeing, apümlang hütsü sobhoung. “Abüdongba-nü Abi dikehrü Israel khümchoko!”

²¹ Abüdongba-nü adhsa ko lihpi akung lih khu anyitsarü nüchehde, arüh axochonü müchongcha. Abinü lung lanü kih chürosohcho; lung xüprüpsohcho ko kih pohchehcho.

²² “Münyirü atsikehchah mühle.” Abüdongba-nü yore.