ISAYA 47 - AMÜSA BAIBEL (BSI)

Babylon Yukhacho

¹ Abüdongba-nü yore, “Babylon, nü yangthsaba pümji lanü jürung, ko alih asongsongla püm. Nüh khüdupi amüthsengcheh lazarü kyo, mümahchehcho yangdi khüdu licho, ta adelü nüh anana ko ashüsheh mükeh! Adelü nüh ayurü lile.

² Anyehsing lungtpah tsü nguung! Ham tsü nyehng! Nü ku tümüshü! Nü jengki atsau tsü khohpehng! Kih kehnung nü shürongthsi phungkehng.

³ Nü tbhüdeng tsü nyitsarünü ngunung; Nüh ashah khyo pümcho arühnü ngunung. Ihnü rühyangnung, ko sünüsü Ih müyatichehnung.”

⁴ Israel Amüsa Tsingrang-nü Ihsa lehchehko, Abi neng tsü Akohba Abüdongba.

⁵ Abüdongba-nü Babylon te yore, “Amarürah la tsü naying püm; adelü yuchotinü nüte yangthsalatpü pü müdsinung.

⁶ I müyurü te I zichürocho; Iyo kyo arüh mükhichicho: Ihnü nü tasela arüh pehjücho; ko nühnü achomang müngusohcho; ashialongrü te mii nühnü kako bichicho.

⁷ Akang ayung yangthsalatpü thsanung nühnü lümcho, ko hiri nü lasih la müyohpücho mahkhang hi apüm khüta changkanung mülümdhingcho.”

⁸ “Hi nyieng, nüh akünyang mükhyahlatpü, akhümcho ko atsikehchah lilepü lümtpü. Nühnü nüh tsü Tsingrangba toh-i, ko nüh kyo süsü mühlepü lümcho. Khodesü chomilarü mükangnung ko tsuzarüti müchangnungepü lümcho.

⁹ Ta bekhyah khüdunü, ko nyümong khüdunü, hi anyüding tikehnung. Nühnü khütoi ziimong bichinye, nü nii ko nü tsurü changnung.”

¹⁰ “Nühnü nü bükyüh amünyi la longlangcho; Sünüsü nüh müngunungepü lümcho. Nü lümlong ko amüdhenü nümülako, ko nübükyünü yocho, ‘Ih tsingrang, Ih kyo aparü süsü mühle.’

¹¹ Nü chah achangba ronung, ko nü zii tunüsü hütsü müyatichehnung. Dhrongyengnü nü chah achangba ronung, nühnü khodesü mümelangcho achangba.

¹² Nü azi-among nguchi apüm yohpüng; nü zadenü hütsü bichi rocho. Kümüdeo hütsü nü nengdang atsa thsanungsü kohle; Kümüdeo arorühti nehsohnungsü kohle.

¹³ Nühnü athsüchiba ngunye nü re mühle. Püti chenghi müchehrü, ninglihkhirü, ningtpah yangchirü ko choonü choo akangla tu tikehnung yorüti tsünü ade ro nüh khümchosohng.”

¹⁴ “Arüh manying bhong kyonung, michangnü arüh trüp-pehnung! Arühnü arühbürü mii mükhümchochehnung, ahenung michang khüdu mah, arüh nengdang mihmüle tsü diranung.

¹⁵ Nühnü akang ayung mücheh roba ninglihkhirü tsünü nü nengdang nguchinung atsa tsü hütsü du thsanung. Arüh apümnü nührü pehjüpü palu langla tsinung, ko nüh khümchonung süsü nying mülinung.”