ISAYA 46 - AMÜSA BAIBEL (BSI)

¹ “Babylon tsingrang nengdang hi achangka! Khüdupilü Bel ko Nebo mübücho, ta adelü arüh gadu chah zangkehre, kyahsehba kanglungrü khangtung nengdang bhamüling.

² Kyothriti tsü arüh jangjang mükhümchocheh; arüh kengcho hitsire. Babylon tsingrang nengdang hi achangka!

³ “Iyu nyieng, Jakob trah, apeh tsicho I müyurü apüm. Ihnü nührü suro nyümong tinü xüküm rore.

⁴ Ih nührü Tsingrang ko nührü shizi kutpoh chüro xükümnung. Ihnü nührü xükümnung thricho; Ihnü nührü tro khümchonung.”

⁵ “Nühnü Ih tu te kihtanung?” Abüdongba-nü yore. “Ih kyo khürü lirü mah-o?”

⁶ Nyitsarünü arüh thsibong khangthrure ko hon thohchehre; arühnü taripi tsü ahosing lanü hore. Arühnü tsingrang kengnung hon kengrü mülihre; hütsüpü arühnü mükhukeh mübüre.

⁷ Arüh pakyarü chah dhikeh dhire; müdüm khüdula yohpüre ko mümühachipü yare. Khürünü hütsüte dangkhidangnangnye, hütsünü mülalingre mahkhang achangba lanü abi mükhümchore.

⁸ “Hi lümchehng, nührü münyirüti; Ihnü tu nguchicho lümdhing.

⁹ Papade tu tikehcho lümchehng; Ih du Tsingrang ko Ih kyo süsü mühlepü müdheing.

¹⁰ Atikehnung tsü adikehlanü Ihnü choyohko; papadenü tu tikehnung Ihnü yoko. I lümchung khodesü mütiphehnung, ko Ihnü lümcho lüpcho nguchinung Ihnü yoko.

¹¹ Nyüchürolangnü nyüh khüdu Ihnü dsire; abinü müdi kyo thsücho jüro I lümchung tsü thümjünung. Ihnü choko ko hütsü nguchinung.”

¹² “Iyu nyieng, nührü ahongzirüti akoh tsü ashula lilepü lümre.

¹³ Ihnü akoh nyümong tsü amünyethsa hirore, hütsü tu shusheng mühle. Ih akohba mümünunung. Ihnü Jerusalem khümchonung ko hütsüla Israel khyang adhichi hirojünung.”