ISAYA 45 - AMÜSA BAIBEL (BSI)

Abüdongba -nü Cyrus Throchehcho

¹ Abüdongba-nü yangthsanung Cyrus throchehko. Yuchoti kohchehnung abi throchehko; yangthsarüti chahnü tase rohchonung abi müthehko; Abüdongba-nü yangdi tbükhüm abi khyang khangthrujünung. Cyrus te Abüdongba-nü yore,

² “Ipunü nü lang rungnümjünung, azong ko akhang angah kangsohnung. Ihnü imüyeng tbükhüm thsangnyangjünung ko arüh idhsedong müpnahjünung.

³ Ihnü amarürah ko arang müdüm lanü nü khyang kuthsi jünung; hütsüde Ih Abüdongbaepü nühnü müdhenung ko Israel Tsingrang-nü nüh anengnü dsichoepü tsüpnung.

⁴ Ihnü throchehba I kulirü Israelrü trosohnung, Ihnü nüh throchehcho. Ihnü nü khyang adhichi amülah jüko, nühnü Ih mütsüpnye.”

⁵ “Abüdongba tsü Ih; apa tsingrang mühle. Ihnü nü khyang re jünung, nühnü Ih mütsüpnye.

⁶ Limih achangka khüulangnü khüulang chii, Ih Abüdongba ko apa tsingrang mühlepü müdhesohnung Ihnü hi nguchire.

⁷ Ihnü atsingse ko ama anyüding külüpcho; Ihnü amüwa ko achangba anyüding jüre. Ih, Abüdongba-nü hiri apüm nguchire.

⁸ Ihnü tsing kyo ninglangnü akoh müthehnung; alihnü hütsü kapü khyüchonung ko nyüje ko yuje la hütsü pinung. Ih, Abüdongba-nü hütsü tikehsohnung.”

Athricho ko Yukheh Abüdongba

⁹ Alih füh khüdunü akülüprü te rehtachehnung do? Aparü kyo füh khüdu du. Lishe tsünü atangrü te tu külüpro pü yochehnung do? Füh tsünü akülüprü te müsithsa pü yochehnung do?

¹⁰ Khürünü hita tpurü te, “Tuepü Ih hita külüpcho pü yochehnung do?”

¹¹ Abüdongba, Israel Amüsa Tsingrang, sünü aronung müdhero Abinü yore: “I tsuzarü nengdang Ite tsingdhingnung nüh athsalang mühle, mahkhang Ih tu nguchinung hütsü yonung mükoh!

¹² Alimih külüp-pü amüi tsurü thri hütsüla lisohba tsü Ih lile. I ziinü ning tsü lehmüthehcho; chonu, nyü ko chenghiti Ihnü ramehre.

¹³ I lümcho tikeh nguchisohnung Ipunü Cyrus tsü thsümüsucho. Abi rachiba lang apüm müchong Ihnü kangsohnung. Abinü Jerusalem, I yangdi külüpchinung, ko arangyohrü lehchehnung. Hi nguchinung sünüsü mümüli mahkhang pohsa müjü.” Akohba Abüdongba-nü choko.

¹⁴ Abüdongba-nü Israelrü te yore, “Ijip ko Ethiopiarü kuthsi tsü nührü yo thsanung, ko Seba-rü akurong nyitsarü tsü nührü yurü kangnung; arüh hohpü nührü khanglang ronung. Arühnü nührü jingte mükhukeh mülang nyengchonung, ‘Tsingrangba nührü te lile, Abi du Tsingrangba.

¹⁵ Israel Tsingrang, sünü Abi nyitsarü khümchoro ko Abi tsü ajangjang rang liba Tsingrang.

¹⁶ Kyothri külüprü atümung ashah khyünung; arüh atümung wahnung.

¹⁷ Ta Abüdongba-nü Israelrü khümchoko, ko abükyü akohba müchangkare; abi müyurü khodesü ashah mükhyünung.’”

¹⁸ Abüdongba-nü ning thricho, Tsingrangba tsü Abi lile! Abinü chürosohcho ko alih külüpcho, Abinü hütsü drengdreng tsüp külüpcho. Abinü hütsü apehlih mükülüp, ta nyitsarü lisohnung külüpcho. Abinü hi yore, “Ih, Abüdongba, ko apa tsingrang mühle.

¹⁹ Ihnü rang tu mücho, mahkhang I lümcho rang müyohbü. Ihnü Israelrü khyang adeng la Ih müyangchisoh. Ih, Abüdongba, Ihnü yuje chore; tu athsalang hütsü Ihnü müdhesohre.”

Lihküp Abüdongba ko Babylon Kyothri

²⁰ Abüdongba-nü yore, Müjang rung, yuchoti müyurü, Nührü yanglih lanü amütrüh; Yukhachah nührü jangjang rung! Singnü külüpcho kyothri bipü chung yarü dangkhidangnangnye mükhümchorü, arühnü tusü mümüdhe!

²¹ Rung ko yukhachah nührü yuzi jüng; Arüh khümrü arüh jangjang kihtasohng. Sünü papadenü atikehnung choyohcho? Hütsü, Ih, Abüdongba, sünü apu müyurü khümchocho Abinü mahrü ang? Apa Tsingrang mühle.

²² “Ade Ih yang ximülaang ko khümchoung, lihküp la lirü apüm! Tsingrangba tsü Ih du lile.

²³ I anyengchoba yuje, ko hütsü mümülichinung. Ihnü Ipu jangjang yuchümre, hütsü Ih: Atümungnü I jingte ro mükhukehnung ko I yochonyinung yuchümnung.”

²⁴ “Ih khu dunü akoh ko re ngunung arühnü yonung; ta I thrünyirü apüm ashah khyo chongchanung.

²⁵ Ih, Abüdongba-nü Jakob trah apüm khümchonung, ko arühnü I neng senung.”