ISAYA 43 - AMÜSA BAIBEL (BSI)

Müyurü Khümchonung Nyengchocho

¹ Israel, nüh thriba Abüdongba-nü yore, “Tüdrü, Ihnü nüh khümchonung. Ihnü nüh anengnü dsicho, nüh Iyo.

² Nüh kih asoh khu kehde, Ih nüte linung; chongchanü nüh mümülümphanung. Nüh michang khu tside, nüh mütrüpnung; athsadsü amülahnü nüh mülerohpehjünung.

³ Tunüo Ih nü Tsingrang Abüdongba, nü khümchobong Amüsa Israel Tsingrang. Nüh lehchehnung Ihnü Ijip pehjünung; Ihnü Ethiopia ko Seba pehjünung.

⁴ Nü kang khümchonung Ihnü yucho apüm pehjünung, tunüo nüh I nengdang thsidi ko Ihnü nüh müire ko dhichire.”

⁵ Tüdrü, Ih nüte lile! “Nyüchüro ko nyüzüdu ashulanü, Ihnü nü müyurü kulang noronung.

⁶ Ihnü kihku lahpi te arüh tsisohnung ko kihjing lahpi te arüh müranglinung yonung. I müyurü limih ashulangnü rosohng, lihküp lih apüm lanü.

⁷ Arüh Ipu müyurü tsatsa, ko I khyang ahechi hirosohnung Ihnü arüh thricho.”

Israel tsü Abüdongba Yuzi

⁸ Tsingrangba-nü yore, “Yukha chah I müyurü dsieng. Arüh nahtse kehle, ta arüh nahtohrü; arüh nangku kehle, ta arüh anangtbengrü.

⁹ Yuchoti tsü yukhalang rosohng. Arüh tsingrang khüibanü atikehnung yochehnung? Ade tikeh yaba hi arüh sünü choyohcho? Arüh yuje-epü yuzi jünung hiri tsingrang khyang yuzi jüsohng.”

¹⁰ “Israelrü, nührü I yuzi lile; Nühnü Ih müdhenung ko I chah yudsinung ko Ih du Tsingrangepü nyichehsohnung, Ihnü nüh I dikehrü thsanung throchehcho. I chah khu apa tu Tsingrang mühle; Khodesü müli ko mülinung.”

¹¹ “Abüdongba tsü Ih du, Abi dunü nüh khümchochehnung.

¹² Tikehnung liba tsü Ihnü choyohcho, hütsüpü Ih nührü tronung rocho. Yangpirü tsingrang sünüsü hütsüta münguchi; nührü I yuzi lile.

¹³ Ih Tsingrang ko Ih lede linung. I zii tenü süsü tsiphunung mükoh; Sünüsü I nguchi mülichinung mükoh.”

Babylon lanü Tsichehcho

¹⁴ Israel Amüsa Tsingrang, nüh khümchoba Abüdongba-nü yore. “Nüh khümchonung Ihnü Babylon nyüm rothsarü müthehnung; Ihnü yangdi tbükhüm tphünung, ko arüh müyurü künyangba tsü atraba kangsohnung.

¹⁵ Ih, nü Abüdongba, Amüsa Tsingrang. Ihnü nüh thricho, Israel ko Ih nührü yangthsaba.”

¹⁶ Papade Abüdongba-nü kihdi khu lang külüpcho, Kih thotho khu lang khüdu.

¹⁷ Abinü amahnung rothsarü adrong nücho, kuri ko kuri akhüluba rothsarü. Arüh müsurochehnungthsa khülucho, dsi mehcho kyo!

¹⁸ Ta Abüdongba-nü yore, “Atsicho la atikehcho chah tükhüm, mahkhang papade atikehcho chah tüngakeh.

¹⁹ Ihnü nguchinung liba nguchi asi chah dhing. Hütsü tikehyale, nühnü ngunung. Ihnü lipilih khu lang pihnung ko hütsüla nü khyang kih pohsohnung.

²⁰ Rangmü kanglungrünü mii Ih dhichinung; Rangfü ko ostrich-nü Ih senung, Ihnü I müyurü nengdang lipilih la kih pohsohde.

²¹ Arüh tsü Ipu nengdang Ihnü thricho, ko arühnü I nengsekhi thsanung.”

Israel Münyi

²² Abüdongba-nü yore, “Ta nührünü Ih müthohko, Israel; nührünü Ih mümübü.

²³ Nührünü I khyang trüp mübü müjü; nührünü kangmübü jo Ih müdhichire. Ihnü nührü chahnü amübü khingnü müchingre, mahkhang müchiji tah mükyahsoh.

²⁴ Nührünü I khyang müchiji mülijü, mahkhang nührü kanglungrü sunü Ih mülongxosoh. Ta nührü münyinü Ih bhamülingsohcho; nührü thsameh shitpahchonü Ih khesohcho.

²⁵ Ta, Ih nührü mülang pehjüba Tsingrang, Ihnü hütsüta nguchi Ih sünang ngusohre. Ihnü nührü münyi mülümchehnung.”

²⁶ “Ihsanü yukhajilang wünung; nührü mülangjüba hirung. Nührü athsalang ngusoh yuzi jüng.

²⁷ Papade jümürünü münyi shitpahcho; langnürütinü Ih nyüm amünyi shitpahcho,

²⁸ ko yangthsarünü Amüsa kuh münyijücho. Hütsü khu Ihnü Israel chah achangba jücho; Ihnü Ipu nyitsarü müthsamünyüsohcho.”