ISAYA 42 - AMÜSA BAIBEL (BSI)

Abüdongba Dikehrü

¹ Abüdongba-nü yore, “Ihnü rezehsohba, I dikehrü hila lile, Ihnü throchehba, sü chah Ihnü longlangre. Ihnü I nbünü abi jengjüko, ko abinü yucho atümung khyang yuje jünung.

² Abinü müzüdenung mahkhang yuva müchüronung mahkhang yanglongla mükhongnung.

³ Abinü thoh akureng mükhyahsahnung mahkhang süsüp yaba dsi tsü mümehsohnung. Abinü atümung khyang müchangkaba yuje hirojünung.

⁴ Abi alongdi müchahnung mahkhang müci müsümnung; Abinü alih la yuje külüpnung. Mütrotinü abinü donung yingnung.”

⁵ Tsingrangba-nü ning külüpcho ko hütsü lehmüthehcho; Abinü alih ko hütsüla liba apüm thricho; Abinü abi nyitsarü apüm khyang akang ko asah jücho. Ko ade Abüdongba Tsingrang-nü Abi dikehba te yore,

⁶ “Ih, Abüdongba-nü limih la yujeba tsü nguchisohnung nüh dsicho, ko nü khyang zii jücho. Nüh khu yucho atümung te Ihnü azengtacho khüdu külüpnung; nüh khu yuchoti yanglang atsingse khüdu hironung.

⁷ Nühnü anahtohrü nah khangthrujünung, ko amarürah arangyoh la lirü lehcheh müthehnung.”

⁸ “Ih du, nü Tsingrang, Abüdongba. Apa tsingrangnü I ahechi müchangtacheh; Ihnü kyothri khyang I nengse müchangtasohnung.

⁹ Ihnü choyohcho ade tikehre. Ade mütikeh-eba kohro nengdang mii nüte yonung.”

Nengse Khi

¹⁰ Abüdongba te khi asi khüdu thsaang; Abi nengsekhi thsaang, liküprünü! Abi seing, nührü kihdi la lirüti; Abi seing, kihdi kangzah apümnü! Thsaang, mütroti ko hütsüla lirü apümnü!

¹¹ Lipilih ko yangditinü Tsingrang sesohng; Kedar-rünü Abi sesohng. Sela yangdila lirünü akünyangnü züde akhang chahnü züdesohng.

¹² Mütro la lirütinü Abüdongba khyang anengse ko ahechi jüsohng.

¹³ Abüdongba-nü akurahrü kyo khatanung würe, Abi chita nengdang longphi rungnüm lile. Abinü chita züde, khata yuva jüre; Abinü Abi rorüh nyüm Abi tase ngusohre.

Müyurü Tronung Nyengchore

¹⁴ Tsingrangba-nü yore, “Anyahli Ihnü sahmüthsa liko; Ihnü I müyurü te mülalingko. Ta ade nguchinung becho chihko; Khingkurü mikhungde kyo Ihnü khongre.

¹⁵ Ihnü akhang ko azong thsangnyangjünung ko za ko singdong kungsohnung. Ihnü yongkhi ngah tsü lipilih kangsohnung, ko changtphü kih kungsohnung.”

¹⁶ “Ihnü I müyurü natohrü nünung, arühnü mütsehdhingba langla. Ihnü arüh amarürah visa kangsohnung, ko arüh bete aküprah lih tsü müjang kangsohnung. Hiri I anyengchotabati, ko Ihnü hütsüri yohpünung.

¹⁷ Kyothri chah longlangrü atümung, sürünü kyothri te tsingrang pü dsiro, arüh tsü jowüsohnung ko ashah khyüsohnung.”

Israel-nü Münyengchochehcho

¹⁸ Abüdongba-nü yore, “Nyieng, nührü anangtbengrü! Hümkeh dhing, nührü anahtohrü!

¹⁹ I dikehba tenü alaa anahtoh-u, I yuhirü tenü alaa anangtbengu lirü do?

²⁰ Israel, nühnü hitoi nguko, ta hütsünü nüh tu nyichehcho? Nüh yuchinung nangku kehle, ta yuje tu yuchicho?”

²¹ Abüdongba tsü khümchonyüba Tsingrang, hütsünü Abi yuzeng ko adoba jücho, ko müyurüti khyang hütsüri bichisohnyüre.

²² Ta ade Abi müyurü mahchehko; arüh shukuh la khangtiko ko arangyoh la rangpüle. Arüh kengchoko ko mahchehko, Sünüsü arüh mümüdropü.

²³ Khürünü dusü hi nyinung mah-o? Ade tinü longi nyinung mah-o?

²⁴ Sünü azührü khyang Israel jücho? Hütsü Ihsanü nyüm amünyi shitpahba, Abüdongba apu lile! Ihsanü Abinü lümcho roh-i müli, mahkhang Abi yuzeng mübichi.

²⁵ Hütsünü Ihsa khyang Abi akhingchi tsü müdhesohcho, ko khata adhsa tsü chongchasohcho. Israel apümlang Abi rihlong tsünü michangnü trüpcho, ta tu tikehrünang Ihsanü khodesü mümüdhecho; Ihsanü hütsülanü tu münyicho.