ISAYA 41 - AMÜSA BAIBEL (BSI)

Israel Rükurü mistri

¹ Tsingrangba-nü yore, “Sahmüthsapü Iyu nyieng, Nührü mütroti! Yukhachah nü khiyu hironung rungnüm, Nü chonung bekhyah ngunung. Sü yujenang müdhenung Ihsanü yukhachah müjang shibülungnung.”

² “Nyüchüro langnü akohrü noroba Ko abi iiwücho apümlang kohsohba tsü süo? Sünü abi khyang yangthsarü ko yuchoti michah akoh ngusohcho? Abi nohshengnü arüh tsü lihwü kyo khülusohre. Abi tbüdengnü arüh tsü nyübong bete mayü roh-i shupishuzare.”

³ Abinü alih la ajing mii müjükehcho roh-i arüh iiwüre.

⁴ Hütsü tikehsohba tsü sünüo? Sünü yukheh tsü chürosohcho? Ih, Abüdongba adikehla licho, ko achangkalasü linung.

⁵ “Mütro la lirütinü Ih ngucho; arüh neh adrüchonü dhridhricho. Achotsü arüh atümung shimükhong rocho.

⁶ Sihthrirünü trotare ko thsüchitare.

⁷ Sing nguchirünü hon kengrü te yore, ‘Tsa nguchiko!’ Sünü kyothri nana kyüro abinü ahamkehtarü te thsüchire. Arühnü yore, ‘Atahkehtaba tsü tsale’ ko kyothri tsü ayohpüjila hamkehpüre.”

⁸ “Ta nüh, I dikehrü Israel, Ihnü throchehba nyitsarü tsü nührü, I shangrü Abraham chahnü trahchocho.

⁹ Ihnü nührü alih changka lanü norocho; Ihnü nührü ashu-uba jongnah lanü dsicho ko nührü te yocho, ‘Nührü I dikehrü.’ Ihnü nührü müpeh, ta throchehcho.”

¹⁰ Tüdrü Ih nührü te lile! Ih, nührü Tsingrang, tunüsü nührü münehsohnung! Ihnü nührü rezehsohnung ko tronung; Ihnü nührü tsungtinung ko khümchonung.

¹¹ “Nührü te zichürorü amükoh ngu ashah khyünung. Nührü te khatarü sünung

¹² ko limih lanü changpehnung.

¹³ Ih nührü Tsingrang Abüdongba; Ihnü nührü rezehsohre ko yore, ‘Tüdrü; Ihnü nührü tronung.’”

¹⁴ Abüdongba-nü yore, “Nüh azikyah ko remüzeh, Israel, tüdrü; Ihnü nüh tronung. Ih, Israel Amüsa Tsingrang, sünü nührü khümchoro.

¹⁵ Ihnü nüh fürü nyehsing aha asi ko akoh kehba kangsohnung. Nühnü azongti nyehnah thsangnyangjünung; akhangti tsü lihwü kang trümnahnung.

¹⁶ Nühnü arüh nyübongla shu pehnung; ko nyübongnü arüh fütsinung, ko tsingxinyübongnü arüh shupishuzanung. Hütsüde Ih nührü Tsingrang thsacho ngang; nührünü künyangnung, Nührünü I Amüsa Israel Tsingrang neng senung.”

¹⁷ “Khode I müyurünü kih dhsütah yangchinang, axochonü arüh linga kungde, Ih, Abüdongba-nü arüh kihchicho lalingnung. Ih, Israel Tsingrang-nü arüh khodesü müpehjünung.

¹⁸ Ihnü akhang akungchah kih pohsohnung, ko angah la kihna pohsohnung. Ihnü lipilih tsü changtphü ko akunglih tsü yongna kangsohnung.

¹⁹ Ihnü lipilih la cedar sing, akacia sing, mertel sing ko olive sing chürosohnung. Alih kung la mürong kangsohnung, kee sing, Juniper sing ko cypres sing mürong.

²⁰ Nyitsarünü hi ngunung, ko Ih, Abüdongba-nü hi nguchicho arühnü müdhenung. Hi Israel Amüsa Tsingrang-nü tikehsohchoepü arühnü müdhenung.”

Arahkheh tsingrang Khyangchicho

²¹ Abüdongba, Israel yangthsabanü hi yore: “Nührü yucho tsingrangti, nührü khiyu hirung. Nührü yuzi atsauba hirung.

²² Hütsü tikehde ihrünü müdhenungthsa, Hila rung ko tu tikehnung choyohng. Yukhachah atikehchoti young, ko hütsü adüzü ihrü te young.

²³ Atikehnung licho ihrü te young, khang nührü tsingrangrüepü ihrünü müdhenung! Atsa khürü nguching mahkhang achangba hirung; ihrü adrünü jengsohng!

²⁴ Nührü ko nührünü nguchiba hi apüm arahkheh; ko sürünü nührü mübüro arüh athrünyinung!”

²⁵ “Ihnü nyüchürolang lirü nyüh khüdu throchehko; Kihku lahpinü mah ronung Ihnü abi noronung. Füh tangrünü lishe dhrümcho kyo, abinü yangthsarü dhrümnahnung.

²⁶ Nüh yuje-epü ihrünü yonungthsa, hi tikehnung sünü choyohnung? Nührü sünüsü hi nengdang yu khüdusü müyo, nührünü tusü yo müyuchi!

²⁷ Zion-rü te yusi tsü yonung, Ih, Abüdongba akhu thsacho; Jerusalem lang yusi hi yonung Ihnü müthehcho, ‘Nührü nyitsarüti tsehle. Arüh kulang thali tsehle!’

²⁸ Ihnü tsingrangti yola tsü dhingde, lango dusü yonung süsü müzehcho; Ihnü tsingdhingba tsü sünüsü mülalingchehcho.

²⁹ Hiri tsingrang apüm arahkheh; arühnü tusü münguchicheh kyothri hiri tase ko zii mühle.”