ISAYA 40 - AMÜSA BAIBEL (BSI)

Alongdi Yu

¹ “I Müyurü tbachijüng” Tsingrangba-nü yore. “Arüh tbachijüng!

² Jerusalemrü thsüching. Arüh te young: arüh kükyo chongchako; Ade arüh mülang pehjüko. Arüh münyi ngang Ihnü arüh ajeng khingchiko.”

³ Yuva khüdunü züdere, “Akungase lih la Abüdongba nengdang lang khüdu rungnüm! Ihsa Tsingrang khyang lihpi lih la lang tsü pihjüng.

⁴ Ayongkoh apüm sühngahng; azong apüm jungahng. Akhang tsü angah kangnung, ko lungrah tsü müjangnung.

⁵ Hütsüde Abüdongba ahechi mishanung, ko amüi tsurünü hütsü ngunung. Abüdongba apunü hi nyengchoko.”

⁶ Yuva khüdunü züdere, “Yusi khüdu sobhoung!” “Tu yusi sobhonung?” Ihnü yocho. “Amüi tsurü tsü za kyolepü sobhoung; Arüh rangmü yungpi tenü anyahliu mühlire.

⁷ Za talüpre ko yungpi trülohre, Abüdongba-nü arüh chah nyübong mütheh fükehde. Nyitsarü tsü za tenü anyahliu mülire.

⁸ Ho, za talüpre ko yungpi mükure, ta Tsingrangba yu lede lire.”

⁹ Jerusalem, azongchah tsü küdung ko yusi atsa tsü sobhoung! Yuva athsengnü dsieng, Zion; yusi atsa tsü müdhesohng! Chochehchüng ko drü tüli. Juda yangditi te young; arüh Tsingrang tsehle!

¹⁰ Amichahba Abüdongba zii la yangthsanung rore, Abi yola Abinü ruhchocho nyitsarüti norore.

¹¹ San-nyahrü kyo Abinü Abi santi xükümnung; Abinü sanzati nübülungnung ko apakyarü chah dhinung; ko Abinü atpati tsü khainü nünung.

Mükitachehba Tsingrang

¹² Khürünü müyo-onü kihjü ho-dhingchehnung do? Mahkhang akhehnü ning tsü kiidhingchehnung do? Shing khüdula limih hi phechehnung do? Mahkhang ahosing la akhang azong hi ho-dhingchehnung do?

¹³ Khürünü Abüdongba te tu nguchinung yochehnung do? Sünü Abi te donung mahkhang Abi te thülanung?

¹⁴ Müdhenung ko nyichonung ko tu nguchinung Abüdongba-nü khürüte kihtarü mah-o?

¹⁵ Abüdongba telü yuchoti tsü tu mah, kih müdri-o tenü alaa mah; ashula mütro khüdu tsü asongsong roh-i ayingya.

¹⁶ Lebanon mürong la liba kanglungrü apüm tsü, Ihsa Tsingrang khyang kangmübü jünung mükükyü, Ko hütsüla sing tsü atahnung mii zarale

¹⁷ Abi jingte yuchoti tsü tu mah.

¹⁸ Tsingrangba süte kihtachehnung? Abi tu kyorünang nühnü khüta yochehnung?

¹⁹ Abi khehnü külüpcho kyothri, ikengrünü hon ko taripinü münohti külüpcho kyothri mükyo.

²⁰ Hon ko taripi mükoh lihrünü, amüsühba sing throchehre. Kyothri tsü mükhülusohnung abinü sihthrirü khyang külüpsohre.

²¹ Nührünü mümüdhe ang? Papadenü nührü te müyo ang? Limih khüta thricho nührünü müyuchi ang?

²² Hütsü yangthsaba pümjila pümbanü külüpcho, alih munglang ko ning khupü; apohki lirü tsü tsangsüh tütoh ngure. Abinü ning tsü akitising shü kyo lehmüthehcho, aliji shükuh kyo.

²³ Abinü yangthsarü nüchore, ko arüh adeng kangsohre.

²⁴ Arüh sing anu kyole, ade du ara ra zii yaba. Abüdongba-nü nyübong müthehde, arüh kungpehre ko mayü kyo fotsire.

²⁵ Amüsa Tsingrang süte kihtachehnung? Abi kyo khürü lirü do?

²⁶ Ningchah tsü dhing! Nührünü nguba chenghi sünü thricho? Rothsarü kyo arüh nüchehba tsünü; Abinü arüh khütoinang müdhele, ko arüh müipi anengnü dsire. Abi zii dirale— arüh khüdusü müchahre!

²⁷ Israel, khang tuepü longmüsüro? Abüdongba-nü nührü dhsangthsi mümüdherepü; mahkhang amüthsalangla chongchade nührü müdhingrepü

²⁸ Nührünü mümüdheo? Nührünü müyuchio? Abüdongba tsü achangka müliba Tsingrang; Abinü limih apüm thricho. Abi khodesü mükyahre mahkhang mükhere. Sünüsü Alümlong münyicheh.

²⁹ Abinü re müzehrü ko kyahsehrü re zehsohre.

³⁰ Azarü mii remüzeh kangre; Dhrezarü kyahseh khülure.

³¹ Ta sürünü Abüdongba chah longlangro, arüh rezehchi kangnung. Arühnü müdi kyo mongnung; arühnü shangnung ko mükyahnung; arühnü tsehnung ta mükhenung.