ISAYA 38 - AMÜSA BAIBEL (BSI)

Hezekia Dhsangnangcho ko Kyangcho

¹ Hütsü shikhe koh yangthsaba Hezekia sümüphoh dhsangnangcho. Ko Amoz tsurü azikehrü Isaya-nü abi shirünung wücho ko abi te yocho, “Abüdongba-nü nüte lüpcho athsalangnü rungnüm yohpünung yore, tunüo nüh mükyangnung. Asünung rungnüm.”

² Hütsüde Hezekia-nü züdilang aromih pipü dangkhidangnangcho:

³ “Abüdongba, Ihnü Nü yochonyi yuje cho Nüh dikeh roko, ko Nühnü tu nguchisohnyücho hütsü du Ihnü nguchi rocho Nühnü lümchehng.” Ko abinü dee tracho.

⁴ Achotsü Abüdongba-nü Isaya te yocho,

⁵ “Hezekia yanglang thali wü hita young, Ih, Abüdongba, nü jümürü David Tsingrang-nü nü dangkhidangnang yuchiko, ko nü nahshükih nguko; dhing, Ihnü nü khyang kang dhüremünga alaa lahkehjüre.

⁶ Ihnü nüh ko hiba Jerusalem yangdi Assyria yangthsaba chahnü khümchonung ko Ihnü mütozah yangdi tsü tsungtinung.” (Arü 21 ko 22 hi yu chungkeh nengdang hila hirore) 21 Isaya-nü yangthsaba te abi kii chah tsü ngurüsihnü alüpji külüp-pü lüpnung yocho, ko hütsünü abi kyangnungepü yocho. 22 Hütsüde yangthsaba Hezekia-nü tsingdhingcho, “Ihnü Amübükuhlang wüchehnung amüdhethsa tu linung?”

⁷ Isaya-nü lalingcho, “Abüdongba-nü Abi anyengchocho yohpünung amüdhethsa khüdu jünung.

⁸ Yangthsaba Ahaz-nü külüpba phaqu chah tsü, Abüdongba-nü nbükhüm tsü phaqu dhüre shehlisohnung.” Ko nbükhüm tsü phaqu dhüre shehlicho.

⁹ Hezekia kyangpü, abinü nengsekhi hi tangcho:

¹⁰ Ih alongdenü asülihlang züdulepü Ihnü lümcho, I kutsüp nyümongti seh müchiepü.

¹¹ Hiba akang lirü limih la, Ihnü khodesü Abüdongba müngunung mahkhang akang lirü süsü müngunung thsaepü Ihnü lümcho.

¹² I kang kyüpehcho ko changkapehcho, Tphünahcho shükuh kyo, Shükyahcho tsehsahcho kyo. Tsingrangba-nü I kang changkajülepü Ihnü lümcho.

¹³ Müyüp adhsa chüro tracho, Kihkhünyingnü I rüh mütrehnahcho kyo. Tsingrangba-nü I kang changkajülepü Ihnü lümcho.

¹⁴ I yuva aikyah ko re müzeh, Ko Ihnü mümüdhrü kyo rühchicho. Ninglang dhingchonü I nah kyahcho. Abüdongba, hiri chongcha apüm lanü Ih khümchoung.

¹⁵ Ihnü tu yonung? Abüdongba-nü hi nguchiko. I lasih thsangnyangre, Ih müyüpsehre.

¹⁶ Abüdongba, Nü nengdang linung, Ihnü Nü nengdang du linung; Ih kyangjüng ko Ih akang lisohng.

¹⁷ I adhsa tsü atbachi kangnung. Dhsürü apüm lanü Ih khümchoung; I münyi apüm pehjüng.

¹⁸ Asülih lanü Nü neng sünüsü müsenung; Asürünü Nüh yuje la mülonglangcheh.

¹⁹ Akang lirünü du Nüh sere, Ihnü ade Nüh secho kyo. Tburünü arüh tsuzarü te Nü yuje nengdang yore.

²⁰ Abüdongba, Nühnü Ih kyangjüko. Ihrünü tbenglah bi Nüh senung, Ihrü akangli ayung, Nü amübükuh la Nü nengsekhi thsanung.