ISAYA 37 - AMÜSA BAIBEL (BSI)

Yangthsabanü Isaya Alümcho Tsingdhingcho

¹ Yangthsaba Hezekia-nü arüh yu tsü yuchiyeng, awahchonü abi jengki rehnahcho, ko müyahshü müpinü Abüdongba Amübükuhlang wücho.

² Abinü yangthsaba kuh xükümba Eliakim, ko yukhachah athrahba Shebna, ko bebürü yola azibarü zeh Amoz tsurü azikehrü Isaya yanglang müthehcho. Arühsü müyahshü müpicho.

³ Isaya te yonung arüh te yoba hi: “Chünye hi chongcha nyümong; ihrü khingchire ko ashah khyo lile. Ihrü hi azarü suronung liba dee tase müzeh khingkurü khüdu kyole.

⁴ Assyria yangthsabanü akang liba Tsingrang müthsamünyünung abi pohki adirü khüdu müthehko. Abüdongba Tsingrang-nü hiri müthsamünyü tsü yuchi hütsüta chorü tsü khingching. Hütsüeko ihrü nyitsarü nying libati nengdang Tsingrangba te kihchijüng.”

⁵ Isaya-nü yangthsaba Hezekia yusi yuchide,

⁶ abinü alalingba hi müthehlicho: “Assyriarünü nührünü mükhümchonungepü yoba yu tsünü nührü tüneh pü Abüdongba-nü yore.

⁷ Abüdongba-nü yangthsaba khyang apu lih lang thalisohnung tsupohyupoh yu khüdu yuchisohnung, ko Abüdongba-nü abi hütsüla kyüsehnung.”

Assyriarünü Adrünung Apa müthehcho

⁸ Assyria yangthsaba tsü Lakish pehjüpü wü Libna yangdila chita yalepü adibanü yuchicho; achotsü abinü abi te shirünung hütsülang wücho.

⁹ Hütsüde Ijiprü rothsarü, Ethiopia yangthsaba Tirhakah-nü nüpü Assyriarü mahnung tsehlepü arühnü yuchicho. Yangthsabanü hütsü yuchi,

¹⁰ abinü Juda yangthsaba Hezekia yang hita yo vathrah khüdu mühehcho: “Nühnü yudsiba Tsingrang-nü nüte nüh I kheh la mükhülunung yoko, ta hütsünü nüh tükiyohchüsoh.

¹¹ Assyria yangthsabanü dhrongchehde masü chah tu khüta nguchirünang hütsü nühnü yuchiko. Nühnü tsiphunungepü lümrü do?

¹² I jümürünü Gozan, Haran, ko Rezef yangditi changjücho ko Telasar la lirü Bethedenrü kyüsehcho, ko arüh tsingrang sünüsü arüh mükhümchocheh.

¹³ Hamath, Arpad, Sefarvaim, Hena ko Ivva yangdi yangthsarüti khülo?”

¹⁴ Yangthsaba Hezekia-nü yuhirü khehlanü vathrah tsü khyo khicho. Hütsüpü abinü Amübükuhlang wücho ko vathrah tsü Abüdongba bete khyangpüpü,

¹⁵ dangkhidangnangcho,

¹⁶ “Akohba Abüdongba, aqo kehba kanglungrü Cherufim chah pümba Israel Tsingrang, lihküp yanglih la yangthsathsaba, Nüh du Tsingrang. Nühnü ning ko alih thricho.

¹⁷ Ade, Abüdongba, ihrü te nyieng ko ihrü chah tu tikehrünang dhingdhing. Senacherib-nü Nüh akang liba Tsingrang müthsamünyü choba tsü nyidhing.

¹⁸ Assyria yangthsarütinü yucho adrong changjücho, arüh lih pehsohcho,

¹⁹ ko singlungrünü arüh khehnü külüpcho kyothri apüm trüp-pehjücho, hi apüm Abüdongba, ihrünü müdhele.

²⁰ Ade, Abüdongba ihrü Tsingrang, lihküp la yuchotinü Nüh du Tsingrangepü müdhenungthsa, Assyriarü khehlanü ihrü khümchoung.”

Yangthsaba Yang Isaya Yusi

²¹ Hütsüde Isaya-nü yangthsaba Hezekia yang abi dangkhidangnang laling

²² Abüdongba chahnü yusi müthehcho, “Senacherib, Jerusalem yangdinü nüh münyodhingre ko müchümükehre.

²³ Nühnü müthsamünyü ko mükhimünguba tsü süepü lümro? Nühnü Ih Israel Amüsa Tsingrang khyang jengreng müjü.

²⁴ Nü kuri akhüluba apüm nüpü Lebanon azong athsenguba kohchehchoepü müthsehmüla nü dikehrü Ih yang müthehcho. Hütsüla Cedar sing athsenguba ko cypres sing atsauba retsu tüzümükhümko, ko nühnü mürong asoh-uba chihko.

²⁵ Shuparü lih la kihkong ju hütsülanü yongcho, ko nü rothsarüti jingnü Nile Yongkhi dhrümkungko pü nühnü müthsehko.

²⁶ “Hi apüm papadenü Ihnü chungchoepü nühnü mümüdhe ang? Ko ade Ihnü hütsü nguchire. Atbüticho yangditi trümnah bhümsohnung zii Ihnü nü khyang jücho.

²⁷ Hütsüla lirüti re mülipehcho; arüh nehseh drücho. Arüh tsü nyüchürolang nyübong adhsa rode fücheh pehba kumungchah za kyole.

²⁸ “Ta Ihnü nüh tu külüpro ko khüde würo, lüpcho müdhele. Ih nyüm nüh khüta rihlong chüroro Ihnü müdhele.

²⁹ Nü rihlong chürocho ko nü müthseh yusi Ihnü yuchiko, ko Ihnü ade nü nabong ko nü bela shumütsanü hohpü nü rocho lang lanü nüli wünung.”

³⁰ Hütsüpü Isaya-nü yangthsaba Hezekia te yocho, “Atikehnung amüdhethsa tsü hi linung. Chükang ko sekang nührünü atsoh chahnü surocho du tsunung, ta zihkanglü nührünü ma shunü xanung ko shükusih khyüm asih tsuchehnung.

³¹ Juda la amütrühti tsü ara asoh rapü asih sihba singdong kyo müwanung.

³² Jerusalem ko Zion zong la amütrühti nyitsarü linung, tunüo Abüdongba-nü hi tikehsohnung dhrongchehpehko.

³³ “Assyria yangthsaba nengdang Abüdongba-nü hita yore: ‘Abinü hiba yangdila müzüduchehnung mahkhang hütsü chah tbüdeng khüdusü mükyachehnung. Rothsarü sünüsü tsung bipü hiba yangdi shündhün mürochehnung, ko hütsü mükang threhju müjuchehnung.

³⁴ Abinü hiba yangdila müzüropü apu rocho lang lanü thali tsinung. Ih, Abüdongba-nü choko.

³⁵ Ipu neng ko I dikehrü David te nyengchocho khyanglangnü, Ihnü hiba yangdi khümnung ko tsungtinung.’”

³⁶ Ko Abüdongba riwürü khüdu Assyriarü müdongchah wünü rothsarü nyüh lakh khüdu hajar qurepü münga kyüsehcho. Nyangnyü khüu arüh apüm sükhang jocho.

³⁷ Achotsü Assyria yangthsaba Senacherib-nü shehli Nineve yang thalicho.

³⁸ Nyümong khüdu amübükuh la abi tsingrang Nisrok mübüyade, atsurü anyüh, Adrammelek ko Sharezer nyühnü anyüh nohshengnü abi kyüsehcho ko Ararat lih lang rang tsicho. Ko atsurü Esaraddon tsü abi mülih yangthsaba kangcho.