ISAYA 35 - AMÜSA BAIBEL (BSI)

Amüsaba Lang

¹ Akung lihnü künyangnung, ko akungaselih la yungpi pinung.

² Lihpi lihnü züde khi thsanung; hütsü Lebanon zong kyo atsah atsa ko Karmel ko Sharon ngah kyo asu lih thsanung. Atümungnü Abüdongba ahechi ngunung, ko Abi dicho ko Abi zii ngunung.

³ Kyahseh liba kheh ko re müzeh liba mükhoh khyang tase jüng.

⁴ Suzah lirü atümung te young, “Müci mülahng ko tüdrü! Nüh khümchonung, ko nü rorüh khingchinung Tsingrangba role.”

⁵ Anahtohrünü ngunung; ko anangtbengrünü yuchinung.

⁶ Ajingjahrünü tsohchi nyiichinung, amongdongrünü züdenung. Lihpi lih khu kihdi pohnung;

⁷ trüp liba lipilih tsü changtphü kangnung, ko akunglih tsü kihna kangnung. Rangfüti liba müdüm tsü rangnu ko thoh chinung.

⁸ Hütsüla tungte lang khüdu, “Amüsaba Lang” linung. Münyirü süsü hütsüba langla mütsehnung; hütsüla tsehrü amüsithsarü sünüsü münümülanung.

⁹ Hütsüla kihkhünying mülinung; adrünung kanglungrü tusü hütsüba langla mülahkhunung. Abüdongba-nü khümchorü du hütsüba lang khu kulang wünung.

¹⁰ Arüh Jerusalem künyang chihnung, akünyangnü züde khi thsanung. Awah ko alongri mülipü, achangka müli arüh künyang linung.