ISAYA 33 - AMÜSA BAIBEL (BSI)

Arüku Nengdang Kihchicho

¹ Ihrü rorüh ahohah! Sünüsü arüh chahnü mükengchonye, arühnü kengchocho ko kihyochücho. Ta kengchonung ko kihyochünung bekhyah changkanung, ko arühbürü akengchorü ko athsüyohchürü kheh la züdunung.

² Abüdongba, ihrü te chomang. Ihrünü Nü chah longdire. Nyümong mükhu ihrü tsungtieng ko ihrü dhsangthsila khümchoung.

³ Nühnü ihrü nengdang khatajüde, ko khata yuva yuchi yuchotinü drü tsire.

⁴ Arüh kohro bhümpüre ko zang hitsire.

⁵ Abüdongba tsü khüta arangcheh! Abinü lüpcho michah yangthsare. Abinü Jerusalem la yujeba ko Amüsabanü jengsohnung

⁶ ko yuchoti khyang adrengdreng jünung. Lede Abinü Abi müyurü tsungtire ko arüh khyang lümlong ko amüdhe jüre. Arüh kuthsi adiuba tsü Abüdongba drüba tsü lile.

⁷ Akurahrünü atroba dsire. Yangtsa hironung müküprü langbürü mii dee trare.

⁸ Langtungte tsü khura dhsürü kangpü sünüsü hütsü khu mütsehre. Yangthsa thsangnyangko ko azengtacho lahsahko. Adelü sünüsü jengreng müjütare.

⁹ Alih tsü akhyüchah müli pehjü lile. Lebanon mürong chang tsile, Sharon ngah alih asu tsü lipilih kangle, ko Bashan ko Karmel zong la singdong chahnü ava trülohre.

Abüdongba -nü Abi Rorüti Müzahsohre

¹⁰ Abüdongba-nü yuchoti te yore, “Ade Ihnü nguchinung. I tase nührü te ngusohnung.

¹¹ Nührünü adeng lümchung chungre ko nührünü nguchiba apüm amükhyu. I nbü tsü michang kyole ko hütsünü nührü changjünung.

¹² Nührü alehlung kangsohnung lung tahcho kyo, ko zeng mihtru kang trüpcho kyo trüpnahnung.

¹³ Amünyeh ko ashula lirü atümungnü Ihnü nguchicho yuchinung ko I tase müdhenung.”

¹⁴ Zion la amünyi nyitsarünü adrüchonü dhridhrire. Arühnü yore, “Tsingrangba yukhaba tsü mümehba michang kyole. Hütsü kyo michang lanü Ihsa khümchochehnung do?”

¹⁵ Nühnü yuje cho nguchikhang, nühnü kohnung. Ailümrü kihyochünung nü tase tübichi ko pohsa tükhyü. Müpsehnung chungrü mahkhang amütsa nguchinung chungrü yola tüzeh.

¹⁶ Khang nüh khümcho linung; nüh roshengvi la pümrü kyo linung. Nü tsunung tsang ko ayongnung kih ngunung.

Aronung Ahechi

¹⁷ Anyüpiu khyangtpah liba lih la yangthsarü khüdunü ahechi la yangthsacho nührünü ngunung.

¹⁸ Shuparü alihmüthsü dhrirü ko füzathsarü drüba tsü alümkehnung khüdu du thsanung.

¹⁹ Adelü münyichehba yu chorü ahongzi shuparü süsü nührünü müngunung.

²⁰ Zion tsü dhing, Ihsanü yudsi yangthsa thsüti mungba yangdi. Jerusalem tsü dhing! Hütsüla tbachi linung khüta atsa! Hütsü khodesü mülohmüiba shükuh, mülohchiba kuhbi ko rangdüshü kyonung.

²¹ Abüdongba-nü Ihsa te Abi ahechi ngusohnung. Ihsa yongkhi amüza ko yongna jüp linung, ta hütsürila arorüh kihkuh mürachinung.

^22-23 Kihkuh chah rangdüshü apüm tsü akhyüchah mühle; akising mükichehre! Ihsanü arorüh kuthsi tsü apüm zang khyünung, ko khütang linung tsü jingjahrüsü jehnung. Abüdongba apu tsü Ihsa yangthsaba thsanung; Abinü Ihsa michah yangthsanung ko Ihsa tsungtinung.

²⁴ Ihsa lih la lirü sünüsü dhsangnanglepü müyonung ko münyi apüm mülangpehjünung.