ISAYA 32 - AMÜSA BAIBEL (BSI)

Adrengdreng Yangthsaba

¹ Nyümong khüdulü adrengdreng yangthsaba khüdu, ko yuje la yangthsarü yucho langnürü chüronung.

² Arüh müipi tsü nyübong ko tsingxinyübong lanü tsikehsing thsanung. Arüh tsü lipilih la pohba yongkhi ko alih akung la lungrah khümki kyo linung.

³ Müyurü dhsangthsi nengdang arüh nah ko nangkhi khangthrunung.

⁴ Arühnü adelü arangcho ko anyichehnü nguchinung, ko arüh lümcho yonung.

⁵ Adohrü dhichinung ko amütsarünü yuje chonung sünüsü mülümnung.

⁶ Adohrünü amüsithsa chonung ko amütsa nguchinung du lümnung. Abinü nguchiba ko choba apüm tsü Abüdongba müthsamünyüre, ko abinü khodesü yangsehrü khyang mütüpre ko xosehrü khyang mütire.

⁷ Amüsithsarü tsü amütsarü ko abinü amütsa du nguchire; arahkheh cho abinü ailümrü changsohnung müküpre ko arüh athsalang ngunung lanü yatire.

⁸ Ta nyitsarü atsanü yuje cho nguchire ko athsalangla drengdreng yare.

Yukhaba ko Külüpchiba

⁹ Nührü thangchi, bhamüling mülipü lirü khingkurüti, Iyu nyieng.

¹⁰ Ade nührü longxo lile, ta sekang hitade nührü dhsangthsi linung, tunüo shükusih alanung tu mülinung.

¹¹ Nührü akang thangchi, bhamüling mülipü licho; ta ade, adrüchonü dhridhrire! Nührü jengki khohpehng ko shüthrehnü nührü kihrüm.

¹² Vahnü dreng hamching, tunüo lihji luh ko shükusiyo thsangnyangpehko,

¹³ ko I müyurü luh la rangmü ko zengnü chitiko. Müyurü künyang liba kuh ko yangdi nengdang traang.

¹⁴ Yangthsaba kuh pehjünung ko yucho yangdiba mii naying pehjünung. Kuh ko hütsü nyahtiba roshengvi lede nengdang thsangnyangpehnung. Hütsü rangmü gadu ko san lamungchah kangnung.

¹⁵ Ta adesü khüdupi Tsingrangba-nü Ihsa yang Abi Anbü müthehnung. Peh liba lih tsü asu lih kangnung, ko luh lanü tsahma khütang chüronung.

¹⁶ Yanglih apümlang Amüsaba ko yuje du linung.

¹⁷ Tunüo atümungnü athsalang du tsü nguchinung, ko lede yangtsa ko akhümcho linung.

¹⁸ Tsingrangba müyurülü alümxü mülinung, ko arüh kuh tbachi khümcho linung.

¹⁹ (Ta mürong la tsü shurü sühnung ko yangdi tsü khülunung.)

²⁰ Tsahma nengdang kih thangchi, misüpung ko gadu nengdang lamungchah apümlang kükyo linung tsü atümung nengdang khütoh-i akünyang thsanung.