ISAYA 31 - AMÜSA BAIBEL (BSI)

Tsingrangba-nü Jerusalem Tsungtinung

¹ Ijiprü te arüku sünü chingro arüh ahohah! Arühnü Ijiprü rothsarü, kuri, kuri akhüluba ko rothsarü chah dümpire. Ta arühnü Israel Amüsa Tsingrang, Abüdongba chah müdümpire, ko arüku müchingre.

² Abinü tu nguchiro abinü müdhele. Abinü achangba müthehre. Abinü amütsarü ko hütsüri khümrü khingchire.

³ Ijiprü tsü tsingrangrü mah, arüh nyitsarü du. Arüh kuri tsü zii mükeh. Khode Abüdongba-nü nguchinang, rezeh yucho khülunung ko arühnü troba remüzeh yucho khülunung. Ko anyüding changpehnung.

⁴ Abüdongba-nü Ite yocho, “San nyahrü tsünü khütoh-i khong züdenye, kanglungrü mükahsehba shuh me tenü kihkhünyingnü müshehnung; hütsü kyo, Zion zong tsungtinung lanü tunüsü Akohba Abüdongba müyaticheh.

⁵ Uzanü aza tsungtinung asüp te mongchicho kyo, Ih, Akohba Abüdongba-nü Jerusalem tsungtinung ko khümnung.”

⁶ Abüdongba-nü yocho, “Israelrü, nührünü Ih nyüm amünyi shitpahko. Ta ade, Ih yang thali rung!

⁷ Nührü atümungnü hon ko taripinü külüpcho kyothriti pehnung becho chihle.

⁸ Assyriarü chitala changnung, ta nyitsarü tasenü mah. Assyriarünü khata lanü drü tsinung, ko arüh kunuti ayurü kangnung.

⁹ Arüh yangthsaba drü tsinung, ko adirünü mii drümüyangnung ko arüh khata nisan pehjünung.” Abüdongba, sü Jerusalem la mübüro ko sü michangnü hütsüla kangmübü trüpro, hiba Abüdongba-nü choko.