ISAYA 3 - AMÜSA BAIBEL (BSI)

Jerusalem la Lümdhama

¹ Ade Abüdongba, Akohbong Abüdongba-nü Jerusalem ko Juda lanü nyitsarünü dümpiba lüpcho ko atümung hitsinung thsako.

² Abinü arüh tsuyongnung ko arüh kih, arüh langkhurü ko arüh rothsarüti, arüh yukharü ko arüh azikehrü, arüh azi-amongrü ko arüh athrahrü,

³ rothsarü, langnürü, thsarahrü ko atikehnung rang liba bichirü thsayahiya nguchirü atümung hitsinung thsako.

⁴ Abüdongba-nü müyurü michah mülümjingrü khyang yangthsasohnung.

⁵ Atümung khüdunü khüdu michah ajingcho khyünyünung. Azarünü azirü jengreng müdrünung, ko tulamüyohrünü adirü khyang jengreng müjünung.

⁶ Tsutpula khüdu throcheh abi te, “Nühlü lango dusü akhyünung lile, hütsüeko Ihsa dhsangthside nüh ihrü langnürü thsaang, pü yonung bekhyah khüdu ronung.”

⁷ Ta abinü lalingnung, “Ihlü doh! Ihnü nührü mütrochehnung. Ih tsuyongba ko jengki thsanye tu mühle. Ih nührü langnürü tükangsoh!”

⁸ Jerusalem changko! Juda sü khülule! Arühnü choba ko nguchiba lüpcho tsü Abüdongba nyüm lile; arühnü misha Tsingrangba apu mükhimüngure.

⁹ Arüh khüpakhüla tsünü arühbürü nyüm yanung. Arühnü Sodom-rünü nguchicho kyo misha amünyi nguchire. Arüh changkako, ko hütsü arühnü arühbürü michah hirocho.

¹⁰ Amüsarü künyangnung, ko arüh nengdang tsa linung. Arühnü nguchichehcho arühnü tsunung.

¹¹ Ta amütsarü changkako; arühnü aparü te nguchiba tsü ade arüh te nguchinung.

¹² Thsi nyasohrünü I müyurü sehchire, ko anyarünü arüh kihyochüre. I müyurü, Nührü khüiba langla wünung mümüdhesohnung, Nührü langnürünü nührü nümülanung.

Abüdongba -nü Müyurü Yukhare

¹³ Abüdongba-nü Abi khiyu yonung rungnüm lile; Abi müyurü yu khanung Abi rungnüm lile.

¹⁴ Abüdongba-nü Abi müyurü azibarü ko langnürü yu khajilang norore. Abinü hita mülangjüre: “Nührünü shükusiluh zühko, ko ailümrü chahnü rohchonü nührü kuh jeng yohpüle.

¹⁵ I müyurü dhrümchinung ko ailümrü chahnü ajingcho khyünung nührü tu athsalang mühle. Ih, Akohbong Abüdongba-nü choko.”

Jerusalem-larü te Amüzahnung Yu

¹⁶ Abüdongba-nü yocho, “Jerusalem-larü khütoi müthsehro dhingdhing! Arühnü arüh naking hingkehpü ning dhing tsehre. Arüh lede mabomashi rachire. Arühnü thrithri mütrahre ko arüh jingnah la tringtring tsü khongsohre.

¹⁷ Ta Ihnü arüh khingchinung. Ihnü arüh thah riri hehpehjünung.”

¹⁸ Abüdongba-nü Jerusalem-larü chahnü lüpcho hitsijünung nyümong khüdu tsehle; arüh jingnah la chingba, arüh thah chah, arüh hong la,

¹⁹ ko arüh khehnah ko jingnah la chingba atang jengki nengdang tsü dira müthsehre.

²⁰ Abinü arüh thah tümba ko arüh kuthri; arüh pükyangla ko kih la rümba zii kehba kohro;

²¹ arüh müyungza ko nabong la yohba imüshi;

²² arüh jengki atsa, bongri-fükhüm, fükhüm ko thsibong;

²³ richeh nguba jengki, anana khehseh ko arüh thah chah rümba shüza, hiri apüm hitsinung.

²⁴ Axümlichi mülih asühxüm; rungrüm mülih rangdüshü; kuva atsa mülih kuva-mükeh; shü mülih müyahshü khyünung; ko arüh atsah tsa mülih ashah hironung!

²⁵ Yangdila lirü athrungrü mii chitala sünung.

²⁶ Yangdi tbükhümnü meshü tranung ko yangdi abükyü tsü khingkurü tbhüdeng alih la pümcho kyonung.