ISAYA 29 - AMÜSA BAIBEL (BSI)

Jerusalem Münguh

¹ Tsingrangba bholu, Jerusalem abükyü mii ahohah! David yangdi ahohah! Kang khüdu anyüh thsütithsünang zeh ro khusohng,

² hütsüpü “Tsingrangba bholu” pü dsiba yangdila tsü Tsingrangba-nü achangba hirojünung. Hütsüla atraba ko meshüba linung ko yangdi apüm tsü bholu ashühnü jengba kyo linung.

³ Tsingrangba-nü yangdi tsü benung, mükangtinung, ko hütsü khyünung.

⁴ Jerusalem tsü alih yonglangnü yuchonung müküpba ko asongsong lanü sahthsaba anbü kyo linung.

⁵ Jerusalem, nührü mahba shuparüti apüm asongsong kyo fotsinung, ko arüh adrünung rothsarüti mayü kyo mong tsinung.

⁶ Dhrongyengnü ko mülongdipü Akohba Abüdongba-nü nührü adrünung tsingxinyübong, ko alihyo zingba lanü khümchonung.

⁷ Abinü tsingxinyübong ko rihlong michang müthehnung, hütsüde Tsingrangba bholu yangdi mahrü rothsarüti apüm, arüh thsunohrüti apüm, lüpcho aromang lango lümdhingcho, ko melang khüdu kyo changpehnung.

⁸ Jerusalem mahnung shibülungrü yucho apüm tsü melang yangtsupü yangseh suroba nyitsarü kyo, mahkhang melang kih yongpü linga mii kungseh suroba, axochonü sotsiba nyitsarü kyo linung.

Amüzahnung Yu Mükhyüchocho

⁹ Nührü adohrü kang lieng! Nührü anatohrü kang lieng! Yongkha müyongpü müchaang! Yongkha bemi-o mii müyongpü khüluching.

¹⁰ Abüdongba-nü nührü nyichisohre, yüpsehsohnung külüpre. Azikehrü tsü müyurü nahtse thsanungbae, ta Tsingrangba-nü arüh nahtohsohko.

¹¹ Azikehrü müngucheh apüm adüzü nührü tenü rang lile; hütsü thrahloh shingticho kyo linung. Akhichehrü yang nüte khi yohsohnung hiwünye, hütsü shingtipü lirü tsü, abinü mükohnungepü nührü te yonung.

¹² Nühnü amükhichehrü yang hiwükhang, abinü mükhicheh pü du lalingnung.

¹³ Abüdongba-nü yocho, “Hiri nyitsarünü Ih mübürepü yore, ta arüh yu tsü amii mühle, ko arüh lasih apalang lile. Arüh yudsi tsü nyitsarü yuzeng ko yukheh arühnü lümkehcho du lile.

¹⁴ Hütsünü Ihnü hiri nyitsarü yola thsayahiya khüdu nguchinung. Amüdherüti adohrü kangkhangnung, ko arüh athsehdhsarü apüm akhyüchah müli kangnung.”

Aronung Alongdi

¹⁵ Sürünü arüh lümchung Abüdongba tenü rangkhunung müküpro, arüh ahohah! Arühnü arüh lümchung bürünü müngu mahkhang mümüdhepü rang nguchire.

¹⁶ Arühnü lüpcho khamülare. Khüi ayingbao, fühtangrü a mahkhang lishe tsüo? Akülüpcho kohronü nyitsarü te, “Nühnü Ih külüpcho mah-o?” Mahkhang, “Nühnü tu nguchiro, hütsü nühnü mümüdhe pü yochehnung mah-o?”

¹⁷ Choyohcho kyo, tunyah mülipü rangmü tsü luh kangnung, ko luh tsü rangmü thali kangnung.

¹⁸ Hütsüba nyümong rode, anangtbengrünü vakha tsü khi yuchinung, ko amala lirü anahtohrü arüh nah khangthrunung ko ngunung.

¹⁹ Ailümrü ko alonglümrünü Israel Amüsa Tsingrang, Abüdongba-nü arüh khyang jüba akünyang tsü thali ngunung.

²⁰ Hütsüta bürü nyümrü ko Tsingrangba mülangjürü changkanung. Münyirü atümung changkanung.

²¹ Sürünü bürü nengchüro, afüashi phikhümro, ko yuje chorü athsalang müngusoh arahkheh yuzithsaro, arüh Tsingrangba-nü changjünung.

²² Hütsünü ade, Abüdongba, Israel Tsingrang, sünü chongcha lanü Abraham khümchocho Abinü yore, “I müyurüti, adelü nührü ashah mükhyüsohnung, ko ashahchonü nührü romih müphasohnung.

²³ Ihnü nührü khyang tsuzarüti jücho ngude, Ih, Israel Amüsa Tsingrangepü nührünü müdhenung. Nührünü Ih dhichinung ko Ih drünung.

²⁴ Adohrünü nyichehnung, ko lede jümjümrünü arüh te dosohnung künyang linung.”