ISAYA 25 - AMÜSA BAIBEL (BSI)

Nengse Khi

¹ Abüdongba, Nüh I Tsingrang; Ihnü Nüh dhichinung ko Nü neng senung. Nühnü anyemüyangnung nguchiko; Nühnü papade külüpcho lümchung yuje cho nguchiko.

² Nühnü yangditi changjüko ko atbüticho thsangnyangjüko. Ihrü rorünü thsaba yangthsarü kuh lede nengdang thsangnyangko.

³ Rezeh yuchotinü Nüh senung; Atsüroh yangditinü Nüh drünung.

⁴ Ailümrü ko achongcharünü Nüh yang tsiroko, ko chongchala tsikehko. Nühnü arüh tsingxinyübong chahnü tsikehsohko, ko trüpsehba adhsa lanü khümkisohko. Akhürah tsingkang tsingxinyübong kyo,

⁵ akungase la trüpsehnyünü kyo Nüh beko. Ta Nüh, Abüdongba-nü ihrü rorüh yatijüko; Nühnü atsürohrüti yuva müchürosoh, nyükhinü adhsa nyümong rühsohcho kyo.

Tsingrangba-nü Thsüti Küdangjüre

⁶ Zion zong hila Abüdongba-nü lihküp la yuchoti apüm nengdang tsuyongnung ko yongkha atsaubanü thsüti khüdu küdangnung.

⁷ Hila Abinü dhrongyengnü yucho apüm chah kehba alongri nyükhi tsü khyümüi pehjünung.

⁸ Amichahba Abüdongba-nü lede nengdang asü tsü changsohnung! Abinü atümung nahtse lanü nahshükih nipehjünung ko limih apümlang Abi müyurü chongchaba ashah tsü hitsijünung. Abüdongba apunü hi choko.

⁹ Hi tikehde, atümungnü yonung, “Abi Ihsa Tsingrang! Ihrünü Abi chah ihrü alongdi yohpücho, ko Abinü Ihsa khümchoko. Abi tsü Abüdongba! Ihrünü Abi chah ihrü alongdi yohpücho, ko ade Abinü Ihsa khümchocho ngang ihrü künyangsehre.”

Moab Khingchinung

¹⁰ Abüdongba-nü Zion zong tsungtinung, ta manying alih kang dhrümnahcho kyo, Moab-rü dhrümchinung.

¹¹ Kihwenung müyungchücho kyo, arühnü arüh kheh müyungchünung, ta Tsingrangba-nü arüh ashah khyüsohnung, ko arüh kheh yahlüp tsinung.

¹² Abinü arüh tbü athseng tsü zeh Moab-rü roshengkuh thsangnyangjünung ko asongsong kang khülusohnung.