ISAYA 24 - AMÜSA BAIBEL (BSI)

Abüdongba -nü Alih Khingchinung

¹ Abüdongba-nü alih tsü changjünung, ko hütsü apehlih kangsohnung. Abinü alih tsah tsü thsangnyangjünung ko hütsüla lirü tsishosohnung.

² Atümung hütsüba suro tsü mütohnung, bebürü ko müyurü, ayurü ko abüdongrü, alihrü ko airü, anyasohrü, ailümrü ko alirü.

³ Alih tsü thsangnyang jonung. Abüdongba-nü choko ko hütsü tikehnung.

⁴ Alih tsü kungchehpehnung ko tsohnahnung; lihküp remüzeh kangnung; ning ko alih anyüding sühnung.

⁵ Nyitsarünü Tsingrangba yuzeng thsangnyang ko lede nengdang külüpcho azengchotaba thsangnyang alih münyijüko.

⁶ Hütsü khu Tsingrangba-nü alih chah chokehcholako. Ko nyitsarünü arüh nguchi ngang ngure. Akang lirü azau nyingre.

⁷ Shükusih mükure, ko hütsünü yongkha müdsire.

⁸ Khüdupi künyang lirü atümung ade wahre, ko arüh tbenglah ko tbhang tii khi thsaba nyehlipehko.

⁹ Adelü yongkha yong khi thsaba mühle; adelü sünüsü hütsü kyo müyongchehre.

¹⁰ Yangdila lüpcho dhamako, ko müyurünü palu kuh la khangti pümre.

¹¹ Yanglongla nyitsarünü khongre, tunüo adelü yongkha mühle. Lede nengdang akünyang changpehko; hütsü alih la khangtipehko.

¹² Yangdi tsü thsangnyang lile, ko tbükhümti khülukhangko.

¹³ Hütsüta lihküp la yucho apüm michah tikehnung. Hütsü tsahma kingkacho roh-i linung, olive sih adong chahnü müxükhangpü ko shükusih chahnü asih laakhangcho kyo linung.

¹⁴ Nying lirüti akünyangnü khi thsanung. Nyüzüdulang lirünü Abüdongba dicho chonung,

¹⁵ ko nyüchürolang lirünü Abi neng senung. Kihbekhümla lirütinü Abüdongba, Israel Tsingrang neng senung.

¹⁶ Ashula lirütinü Israel, Amüsaba yucho se khithsacho Ihsanü yuchinung. Ta I nengdanglü alongdi mühle! Ihlü chang tsire! Akhürahrünü mütozah kihyochüre, ko arüh akihyochüba nguchi alaa amütsauba kangre.

¹⁷ Iyu nyieng, nührü atümung! Adrünung, shukuh, ko zengnü nührü yingle.

¹⁸ Nyüh khüdunü adrüba lanü tsichehde, shukuh la dhrümrangnung, ko sü shukuh lanü tsichehnang abi zeng la xohnung. Ning chahnü tsing serasah sühnung ko alih müdongkehji shühchinung.

¹⁹ Alih tsü tsohrüpnung ko kahrüpnung.

²⁰ Alih abükyü tsü amücharü kyo khüluchinung, ko tsingxinyübongla kuh shühchicho kyonung. Limih tsü abi amünyinü müdsengtsure; hütsü khülure ko khodesü müsuronung.

²¹ Abüdongba-nü amunglang zii ko alih la yangthsarüti khingchinung nyümong role.

²² Tsingrangba-nü yangthsarüti arangyohrü kyo shukuh la nübülungnung. Abinü arüh khingchinung becho müchide khangti yohpünung.

²³ Chonu marürah kangnung, ko nyünü müdhsapehnung, tunüo Akohba Abüdongba tsü yangthsaba kangnung. Abinü Zion chah Jerusalem la yangthsanung, ko müyurü langnürütinü Abi ahechi ngunung.