ISAYA 22 - AMÜSA BAIBEL (BSI)

Jerusalem Nengdang Yusi

¹ Hiba hi Müngucheh Ngah nengdang Yusi. Tu tikehro? Tuepü yangdila müyurü apümnü kumungchah thsüti khyüro?

² Yangdila tsü khong rongrong müci rohchonü jeng lile. Nührü nyitsarü hiba rothsala sürü tsü chitanü sücho mah.

³ Nührü langnürüti apüm drü tsicho ko arühnü tbüdeng khüdusü mükyaede rangkhangpehcho.

⁴ Ade asürü I müyurü apüm nengdang tranung I müleng pehjüng. Ih kihchonung tümüküp.

⁵ Hiba bekhyah hi Müngucheh Ngah la lümdhama, yüyümingming, ko amükoh bekhyah, ko hütsü Akohba Abüdongba-nü Ihsa yang müthehcho lile. Ihsa yangdi tbüsü trümtsupehko, ko arüku ching khongchonü azong tehjengko.

⁶ Elam lih lanü rothsarüti singthsalu ko tbüdeng bipü kuri chah pümpü rocho. Kir lih la rothsarüti arüh tsung thsachehko.

⁷ Juda asu lih tsü kuri akhülubanü jengko; rothsarüti kuri chah pümpü Jerusalem tbükhüm la yako.

⁸ Juda tbü apüm khüluko. Hütsü tikehde, nührünü thsalukuh lanü thsunohrü hirocho.

⁹ Jerusalem tbü akülüpchinung nührünü nguko.

¹⁰ Nührünü Jerusalem la kuh apüm xodhingcho ko yangdi tbü thsanung lung khyünung kuh khürü tphücho.

¹¹ Changtphü ahiba lanü poh jürocho kih tingsohnung, nührünü yangdi yonglang kihkong khüdu külüpcho. Hi tikehsohnung papadenü chungba Tsingrangba te nührünü mühnyi.

¹² Hütsüde tra meshünung, nührü thah hehpehnung ko müyahshü müpinung Akohbong Abüdongba-nü dsicho.

¹³ Ta nührünü münyüjücho, ko thsüti tsucho. Nührünü atsunung san ko misü kyüsehcho ko yongkha yongcho. Nührünü yocho, “Ihsanü tsunung ko yongnung! Atulü Ihsa sopehnung.”

¹⁴ Amichahba Akohba Abüdongba apunü Ite chota yocho, “Arüh akangli ayung hiba münyi hi khodesü mülang müpehjünung, Ih, Amichahba Akohba Abüdongba-nü choko.”

Shebna yang Amüzahnung

¹⁵ Amichahba Akohba Abüdongba-nü Ite wü yangthsaba kuh la müshoba, Shebna te hita yonung yocho,

¹⁶ “Nühnü nüh süepü lümro? Lungrah la tsü nüpu kong xangnung nüh tu athsalang licho?

¹⁷ Nüh aying khüdu thsanung kohle, ta Abüdongba-nü nüh thromüsu dhiyohchüpehnung.

¹⁸ Abinü nüh lungphülung kyo thromüsunü ko mükyah amülah khüdulang tsayohchüpehnung. Nühnü dümpiba kuri akhüluba bete tsü nüh sünung. Nühnü abüdongrü khyang ashah jüre.

¹⁹ Abüdongba-nü nüh nguchi lanü pehnung ko nü yaji athseng lanü nüh nüchonung.”

²⁰ Abüdongba-nü Shebna te yocho, “Hütsü tikeh nyümong, Ihnü Hilkia tsurü I dikehrü Eliakim müthehnung.

²¹ Ihnü nü fükhüm ko nü rungrüm abi khyang khyüsohnung ko nü kheh la liba tase apüm abi khyang jünung. Abi Jerusalemrü ko Judarü au kangnung.

²² Ihnü abi khyang David chahnü trahchocho, yangthsaba tase apüm jünung. Abi kheh la dochungkuh azihsing zehnung; abinü khangthruba tsü sünüsü mükhangtichehnung, ko abinü khangtiba tsü sünüsü mükhangthruchehnung.

²³ Ihnü abi drengdreng vihpünung, ko abi tsutpu apüm nengdang abi tsü ahechi pohchehji thsanung.

²⁴ “Ta abi tpurü ko jünirüti tsü abi nengdang bhamüling kangnung. Avihsing chah shingtbhürü vihpücho kyo, abi chah arüh hohyehpü rachinung.

²⁵ Hütsü tikeh nyümong, adrengdreng avihsing tsü lülohnung ko khülunung. Ko hütsü chah vihpüba apüm tsu hütsü achangka linung.” Abüdongba-nü choko.