ISAYA 21 - AMÜSA BAIBEL (BSI)

Babylon Khülunung Müngucheh

¹ Hiba hi Babylon nengdang Yusi. Lipilih lahkhu tsingrangrü chita nyübong fücho kyo, adrünung limih khüdu lanü thohthüdhsürü ronung.

² Ihnü kihyochüba, ko achangba amütsa müngucheh khüdu nguko. Elam rothsarüti, mahng! Media rothsarüti, yangdi tsü betieng. Babylon-rünü jüba chongcha tsü Tsingrangba-nü changkasohnung.

³ Ihnü münguchehla nguba ko yuchiba tsünü Ih drüsohcho, ko khingkurü mikhung thsade kyo thsacho.

⁴ I thah ngure, ko adrüchonü dhridhrire. Manung nahkohdhsa licho, ta adrü du hirojücho.

⁵ Münguchehla tsü thsüti khüdu küdangcho; ko shirü pümsohnung phah khyangpüjü ngucho. Arüh tsuyong licho. Dhrongyengnü anüchibanü mehcho: “Adirüti, nührü tsung rungnüm!”

⁶ Hütsüpü Abüdongba-nü Ite yocho, “Wüng ko roshengrü yasohng, ko abinü tu ngunang yusi jüsohng.

⁷ Abinü kuri chah nyüh anyüh-anyüh pümpü, ko gadu ko ut chah pümpü ro ngukhang, abinü hütsüri longi dhingsohng.”

⁸ Roshengba tsünü züdecho, “Adirü, Ih ama atsingse mükhyang I yaji la nyah yare.”

⁹ Dhrongyengnü, arüh role! Kuri chah nyüh anyüh-nyüh pümpü. Roshengba tsünü yusi jücho, “Babylon khüluko! Arühnü mübüba kyothri apüm alih la müpnah jole.”

¹⁰ I müyurü Israel, nührü litoh kyo nyehko, ta ade Ihnü Israel Tsingrang, Akohba chahnü yuchicho yusi nührü te müdhesohko.

Edom Nengdang Yusi

¹¹ Hiba hi Edom nengdang yusi. Khürünü Edom lanü Ih dsicho, “Roshengba, khode ama hi khukhangnung? Hütsü khode changkanung Ite young.”

¹² Ihnü lalingcho, “Tsingsele, ta ama thali ronung. Thali tsingdhingnyükhang, thali ro tsingdhing.”

Arabia Nengdang Yusi

¹³ Hiba hi Arabia nengdang yusi. Akungase Arabia lih la shitsehrü müdong liba, nührü Dedan-rü,

¹⁴ nührü yang rorüh axosehrü khyang kih tieng. Nührü Tema lih la lirüti, atsichirümchirü khyang tsuyongnung jüng.

¹⁵ Arüh kyüsehnung mii yaba nohsheng, kyanung tbengkeh liba singthsalu ko khata dhsürü apüm lanü müyurütinü rang tsire.

¹⁶ Hütsüpü Abüdongba-nü Ite yocho, “Kang khüdula Kedar yucho mülahba tsü changkapehnung.

¹⁷ Kedar la singthsalu birü tsü akurahrüti lile, ta arüh aza du nyingnung. Ih, Israel Tsingrang Abüdongba-nü choko.”