ISAYA 2 - AMÜSA BAIBEL (BSI)

Müchangkaba Yangtsa

¹ Juda ko Jerusalem nengdang Amoz tsurü Isaya khyang Tsingrangba-nü jüba yusi tsü hi:

² Aronung nyümongla amübükuh yaba zong tsü apüm tenü athsengu thsanung, akhangti apüm phatinü. Yucho adrongnü hütsülang shinung,

³ ko nyitsarü adrongnü hita yonung, “Ihsanü Abüdongba Khang chah tsü küdunung, Israel Tsingrang amübükuhlang. Abinü tu nguchisohnyüro hütsü Ihsa te donung; abinü throchehcholang Ihsa tsehnung. Tunüo Abüdongba adoba Jerusalem lanü rore; Zion lanü abinü müyurü te chotare.”

⁴ Abinü yuchoti kahla yukhanung. Arühnü arüh nohshengnü arüh fühjeng; ko arüh thsuhnü ishih kengnung. Yuchotinü adelü khodesü müchitanung, khodesü khatanung müküdangnung.

⁵ Ade, Jakob trah, Abüdongba-nü jüba atsingsela tsü Ihsanü tsehnung.

Hongzirü Changjünung

⁶ O Tsingrang, Nühnü Nü müyurü, Jakob trah thrüchahchüpehko! Yanglih la nyüchürolangnü ko Filistia lanü azi-among nguchinü jengko.

⁷ Arüh lih tsü hon ko taripinü jeng lile, ko arüh kuthsilang achangka mühle. Arüh lih tsü kurinü jeng lile, ko arüh kuri akhülubanü müdsi mühle.

⁸ Arüh lih tsü kyothrinü jeng lile, ko arühnü arüh khehnü külüpcho kohro mübüre.

⁹ Arüh atümung mükhimüngunung ko ashah khyüsohnung. Arüh mülang tüpehjü, Abüdongba!

¹⁰ Arühnü lungrahkurah lungkhi la rangnung mahkhang Abüdongba rihlong lanü khümchonung ko Abi zii ko ahechi lanü rangnung alih la akhi junung.

¹¹ Nyitsarü müthseh changkanung ko hongziba changkanung nyümong khüdu tsehle. Hütsüde Abüdongba du dhimüsunung.

¹² Hütsü nyümong Akohbong Abüdongba-nü tase zehrü atümung, amüthsehrü ko hongzirü apüm longlümsohnung.

¹³ Abinü Lebanon la cedar sing athseng tsü ko Bashan lih la langsing apüm tsü khülusohnung.

¹⁴ Abinü akhang azong athseng tsü ngahsohnung,

¹⁵ ko rangrangkuh ko roshengvi tbü apüm khülusohnung.

¹⁶ Abinü adiuba ko atsah atsauba kihkuh tsüsü mülingyohsohnung.

^17-18 Nyitsarü müthseh tsü zahsohnung, ko nyitsarü hongzi tsü thsangnyangjünung. Kyothri riri changpehnung, ko hütsü nyümong Abüdongba du dhimüsunung.

¹⁹ Khode alih shüchinung abi ronang, nyitsarünü lungrahkurah ko lungkhi la rangnung mahkhang Abüdongba rihlong lanü khümchonung ko Abi zii ko ahechi lanü rangnung alih la akhi junung.

²⁰ Hütsüba nyümong rode, arühnü khehnü külüpba hon ko taripi kyothriti pehnung, ko arangyongmüza ko lütphing khyang pehjünung.

²¹ Khode Abüdongba alih shühchinung ronang, nyitsarünü Abi rihlong, zii ko ahechi lanü tsiphunung lungrahkurah ko lihkhi ko lungkhi la rangnung.

²² Asüba nyitsarü chah long tülang. Arüh tu ngangro?