ISAYA 17 - AMÜSA BAIBEL (BSI)

Syria ko Israel Khingchinung

¹ Abüdongba-nü yocho, “Damaskas tsü adelü yangdi müthsanung; hütsü sehnyeh bhüm khüdu du thsanung.

² Syria yangditi lede nengdang thrüchahchüpehnung. Hütsü kanglungrü lamungji thsanung, ko aipehrü süsü mülinung.

³ Israel tsü akhümrü mülinung, ko Damaskas nyüje yanglih chahnung. Amütrüh Syria-rü tsüsü Israelrü kyo awahla linung. Ih, Akohbong Abüdongba-nü choko.”

⁴ Abüdongba-nü yocho, “Israel mülahba tsü changkanung nyümong khüdu tsehle, ko abi kuthsi müli iilümshingchehnung.

⁵ Israel tsü bhidong kyonung, Refaim Ngah la ariichehcho apehluh kyo linung.

⁶ Amütrüh azikyah du nyingnung, ko Israel tsü olive singdongchah asih laakhang khyüpü amülelang mahkhang, ayinglang asih khüdu anyüh du kehcho kyo linung. Ih, Abüdongba, Israel Tsingrang-nü choko.”

⁷ Hütsüba nyümong rode, müyurünü arüh Akülüprü, Amüsa Israel Tsingrang yanglang ximülanung.

⁸ Arühbürü khehnü külüpba bholu chah müdümpinung, mahkhang khehnü külüpcho Ashera tsingranglarü ko müchiji tahba bholu chah mülongdinung.

⁹ Hütsüba nyümong rode, khümkhüm tbüti liba yangditi trümnyang pehjünung, ko Amor-rü ko Hiv-rünü Israelrü betenü drü tside pehjü tsiba yangditi kyo linung.

¹⁰ Israel, nührü nüchehba ko Akohba lung kyo, nührü tsungtiba Tsingrang nührünü nbüchüpehko. Ko yangpirü tsingrang mübünung nührünü amüsa tbü tbücho.

¹¹ Ta nührünü tbü tbüba nyangnyünü thümlang api pinye, hütsü chah asih müsinung. Ta chongcha ko mükyangba adhsa du linung.

Arorüh Yuchoti Kohchehcho

¹² Tase zeh yuchoti tsü kihdi khongcho yuva kyonü, ko kiloh Yuva arangcheh kyonü rongrongta linung.

¹³ Yuchotinü kih thotho roh-i rore, ta Tsingrangba-nü arüh yübüre ko arühnü nyehlire, akhangchah asongsong kyo fopehre ko mayü kyo nyübongnü fopehre.

¹⁴ Anyüzehlang rihlong chürore, ta anyangnyülü arüh changpehre. Ihsa lih mahrü müipi müngu tsü hütsü kyonung.