ISAYA 16 - AMÜSA BAIBEL (BSI)

Moab Alongdi Mülicho

¹ Lipilih lang Sela yangdi lanü Moabrünü Jerusalem la yangthsaba khyang sanza khüdu jiyü müthehre.

² Arühnü Arnon Yongkhi bekhümla yingre ko uza asüp lanü müthehde kyo, arühnü tu nahdhingkeh mülipü wüli-roli rachire.

³ Arühnü Judarü te yorü, “Ihrü te tu nguchinung young. Nyüthungla singdong khüdunü akhümki jücho kyo, ihrü tsungtieng ko nü khümki ihrü kyahshangsohng. Ihrü atsichi rümchirüe; sünüsü müngunungla ihrü rangsohng.

⁴ Nührü lih la ihrü lisohng. Ihrü changsohrü chahnü ihrü khümchoung.” (Sehchiba ko thsangnyangjüba changkanung, ko limih thsangnyangjürüti kingkanung.

⁵ Hütsüpü David chahnü trahchocho nyüh khüdu yangthsaba kangnung, ko abinü müyurü michah yuje cho ko amüila yangthsanung. Abinü tu athsalang hütsü dhsüdhsa nguchinung, ko yuje du tsü abinü nguchisohnung)

⁶ Judarünü yore, “Moab-rü müthsehcho ihrünü yuchiko. Arüh hongzicho ko kükhingcho ihrünü müdhele, ta arüh tüzümükhümba tsü adeng.”

⁷ Moabrünü chongcha mürang tranung. Arühnü Kir Heres yangdila tsuba tsuyongnung atsa tsü lümchehde, arüh apümnü tranung. Arüh longri iipehnung.

⁸ Heshbon shündhün yoza ko Sibma-rü shükusiluh changsohko, hütsü shükusiluh lanü yongkha külüp yangthsarüti müchasohcho. Bekhyah khüdula shükusiluh tsü Jazer yangdi chii, nyüchürolang lipilih, ko nyüzüdulang Asü Kihdi chii licho.

⁹ Ade Ihnü Jazer nengdang tracho kyo, Sibma shükusih nengdang trare. Heshbon ko Elealeh nengdang I nahshükih threhre, tunüo müyurü künyangnü maxasohnung mühle.

¹⁰ Adelü lihsu luh la tsü süsü künyang mühle. Shüsiluh la tsü sünüsü müzüdere mahkhang khi müthsare. Sünüsü yongkha külüpnung shükusih müdhrümre; akünyang yuva changkako.

¹¹ Ihnü Moab nengdang rühchire ko Kir Heres nengdang longrire.

¹² Moabrünü azonglang amübükuhlang dangkhidangnangnung wüchonü müthohre, ta hütsünü arüh tu müjingchonung.

¹³ Yusi hi Abüdongba-nü akhudinü Moab-rü khyang müdhesoh licho.

¹⁴ Ko ade Abüdongba-nü yore, “Kang asangla Moab kuthsi hitoi hi changpehnung. Nyitsarü hitoi lanü, aza du nyingnung, ko arüh tsüsü re müzehrü du thsanung.”