ISAYA 13 - AMÜSA BAIBEL (BSI)

Babylon Khingchinung

¹ Amoz tsurü Isaya-nü Babylon nengdang Tsingrangba chahnü yusi khüdu ngucho.

² Asehsa akhang amüjohchah tsü chita nengthsashü tsü thung! Rothsarü te züdeing ko amüthseh yangdi tbükhümti tsü mahnung amüdhethsa nü kheh dhimüsung.

³ Abüdongba-nü Amüsa khata chitanung ko abinü zichürorüti te khatanung abi athrungrü ko longlangba rothsarüti dsichehcho.

⁴ Azongchah yuva tsü nyieng, sühdi arangcheh yuva, limih yuchoti shimükhongcho yuva. Rothsarü Abüdongba-nü chita nengdang abi rothsarüti rungnümle.

⁵ Arüh tsü ashula alih changka lanü azii chüro apüm changjünung rore.

⁶ Müci rohchoung! Akohbongnü achangba hiroba nyümong, Abüdongba nyümong amünyethsa lile.

⁷ Nyitsarü atümung kheh re müzehpehnung ko suzahpehnung.

⁸ Arüh atümung drümüyangnung, ko khingkurü zatbüde dhsacho kyo tohdhsanung. Arühnü drüseh dhingtanung, ko ashahchonü arüh romih dhrüdhrünung.

⁹ Abüdongba nyümong, Abi rihlong chüroba ko adrünung nyümong tsü tsehle. Limih tsü apehlih kangsohnung, ko münyirü atümung changsohnung.

¹⁰ Püti ko chenghiti apümnü müvipehnung, ko achüro denü nyü tsü nyahnung, ko chonunü atsingse müjünung.

¹¹ Abüdongba-nü yore, “Ihnü limih chah achangba hironung ko münyirü apüm arüh münyi ngang khingchinung. Amüthsehrü ko hongzirü ko akhürahrü apüm Ihnü khingchinung.

¹² Amütrüh tsü hon tenü amüdsiu kangnung.

¹³ Ihnü ning dhridhrisohnung, ko Ih Akohbong Abüdongba-nü rihlongchüro nyümong limih mii ajoji lanü shehmüinung.

¹⁴ “Babylon la lirü shuparüti palu limih yangchi shu-iirü bete shümüshü tsicho kyo, ko anyahrü müliba san kyo tsohshonung.

¹⁵ Sü rangnang abi thraseh süsohnung.

¹⁶ Arühbürünü dhing arüh tsurüti xüpseh süsohnung, arüh kohro zang khyüjünung, ko arüh nitpürü te khing thsangnyangnung.”

¹⁷ Abüdongba-nü yore, “Babylon mahsohnung Ihnü Medes-rü thsümüsure. Arühnü taripi mümükhyahre ko hon-nüsü arüh müthsadsüchehre.

¹⁸ Arüh singthsalu ko tbüdengnü dhrezarüti kyasehnung. Arühnü akhungarü ko tsuzarü te yanglilüm mülinung.

¹⁹ Babylon tsü atsah atsau yanglih lile; hütsü müyurü akünyang. Ta Ih, Abüdongba-nü Sodom ko Gomora chah nguchicho kyo Babylon mükhapehnung!

²⁰ Hütsüla adelü sünüsü thali mülinung. Tsichi rachiba Arab-rü sünüsü hütsüla abi shükuh müthsanung, ko san nyahrünü hütsüla arüh san mülamungsohnung.

²¹ Hütsü rangmü kanglungrü mungji ko phohphu kehji thsanung. Hütsüla ostrich linung, ko shuhu mungnung.

²² Rangrangkuh ko yangthsarü kuh tsü khünying ko shirung khongcho tehkehsing thsanung. Babylon becho chihko! Abükyü nyümong khukhangko.”