ISAYA 10 - AMÜSA BAIBEL (BSI)

¹ Nührü ahohah! Nührünü yuje mücho yuzeng külüp I müyurü khingchire.

² Hütsüta nührünü ailümrü khyang arüh athsalang ko yuje müngusohre. Hütsüta nührünü chomirü ko mürürü kuthsi khyüjüre.

³ Tsingrangba-nü nührü khingchide nührü khütanung? Abinü nührü chah ashulanü achangba hirode, nührünü tu nguchinung? Nührü süchah tsikehnung? Nührü kuthsi khüde rangnung?

⁴ Khatala nührü kyüsehnung mahkhang arangyohrüthsa nührü tphah notsinung. Hütsütanye Abüdongba rihlong münyehlinung; ko khingchinung Abi kheh dhimüsu du linung.

Tsingrangba-nü Assyria Yangthsaba Bichicho

⁵ Abüdongba-nü yocho, “Assyria! Ihnü sürü te zichüroro, arüh khingchinung nengdang Ihnü Assyria tsü ja khüdu kang bichire.

⁶ Tsingrangba mümüdheba yuchoti ko I zichürosohrüti khingchinung Ihnü Assyriarü müthehcho. Kohro zang khyünung ko müyurü tsü yanglongla sehnyeh kyo dhrümchinung nengdang Ihnü arüh müthehcho.”

⁷ Ta Assyria yangthsabanü apu lasih la shühkhatohnung lümchung licho, abinü yucho adrong changjünung dhrongre.

⁸ Abinü tüzümükhüm yocho, “I rothsarü anüchirüti atümung yangthsarü lile!

⁹ Ihnü Kalno ko Karkemish yangditi, Hamath ko Arpad yangditi kohchehcho. Ihnü Samaria ko Damaskas kohchehcho.

¹⁰ Kyothri mübüba yanglihti, Jerusalem ko Samariarü tenü adrongu, arüh michah I kheh dhimüsuko.

¹¹ Ihnü Samaria ko hütsüla liba kyothri apüm thsangnyangjüko, ko Ihnü Jerusalem ko hütsüla mübüba kyothriti chah Ihnü hütsü kyo nguchinung.”

¹² Ta Abüdongba-nü yore, “Ihnü Zion Khang ko Jerusalem chah nguchi yaba hi thümde, tüzümükhüm ko müthsehchonü Ihnü Assyria yangthsaba khingchinung.”

¹³ Assyria yangthsabanü tüzümükhümnü yocho, “Hütsü Ipunü nguchicho. Ih re azeh, amüdhe ko athsehdhsa. Yuchoti kahla lurü Ihnü lohpehjücho ko arühnü zahkehcho tsuyongba khyücho. Hütsüla lirü chah misüpungnü kyo Ihnü dhrümchicho.

¹⁴ Alimih yuchoti tsü uza süp kyo, ko arüh kuthsi tsü uza kyü kyo Ihnü khyübülungcho. Ih drüsohnung aqo mii müki; I chah khongkehjünung abe mii mükhangthru!”

¹⁵ Ta Abüdongba-nü yore, “Pühnü abichiba nyitsarü tenü abi adiuepü yochehnung do? Singxasing tsü axaba tenü atungteu do? Janü nyitsarü müthromüsure; nyitsarünü ja tsü thromüsure.”

¹⁶ Ade kükyo lirü khingchinung Abüdongba-nü dhsara khüdu müthehnung. Arüh füla trüp du trüpba michang linung.

¹⁷ Israelrü atsingse, Tsingrangba tsü michang kangnung. Israel Amüsa Tsingrang tsü michang kangnung ko nyümong khüdunü zeng ko zengdong mii zeh lüpcho trüp-pehnung.

¹⁸ Dhsangnangnü nyüh khüdu changjücho kyo, mürong ko luh apüm riri changjünung.

¹⁹ Azarü khüdunü mii khichehnungthsa, singdong tsü zara kangnung.

Amütrüh Thali Ronung

²⁰ Israelrü amütrühnü adelü arüh mahba yucho chah müdümpinung nyümong tsehle. Arühnü yuje arüh alongdi Abüdongba Israel Amüsa Tsingrang chah yohpünung.

²¹ Amütrüh Israelrü thali arüh Akohbong Tsingrang yanglang ronung.

²² Ade Israelrü kihdi la lihpi toi linye, arüh azikyah du thali ronung. Müyurüti changkhangnung yingle, ko hütsü arüh aleng lile.

²³ Ho, Abinü yocho kyo, limih apümlang Akohbong Abüdongba-nü achangba hirojünung.

Assyria Khingchinung

²⁴ Amichahba Akohbong Abüdongba-nü Zion la lirü apu müyurü te yore, “Ijiprünü kyo Assyriarünü nührü sehchinye, arüh tüdrü.

²⁵ Tunyah mülipü Ihnü nührü khingchikanung, hütsüpü Ihnü arüh changjünung.

²⁶ Ih, Akohbong Abüdongba-nü Oreb Lung te Midian-rü chah xüpcho kyo Ihnü arüh chah I axüpjinü xüpnung. Ihnü Ijip khingchicho kyo Assyriarü khingchinung.

²⁷ Hütsüba nyümong rode, Assyriarü khehlanü Ihnü nührü müthehnung, ko nührü khang chah arüh hongzihnü bha mümülingsohnung.”

Amahrünü Becho

²⁸ Arorüh rothsarünü Ai yangdi mahchehcho. Arühnü Migron lahkhu wücho. Arüh tsangdhi Mikmash la yohpücho.

²⁹ Arühnü lang tsü khupü Geba la yüp yacho. Rama yangdila lirü drümüyangcho, ko yangthsaba Saul yangdi Gibea la lirüti rang tsicho.

³⁰ Züdeing, Gallim-rü! Nyieng, Laisha-rü! Laling, Anathot-rü!

³¹ Madmena-rü ko Gebim-rü rang tsile.

³² Chünye arorüh tsü Nob yangdila lile, ko Jerusalem yangdila, Zion Khang chah arüh kheh maretare.

³³ Singchah ajengza hungpehcho kyo Akohbong Abüdongba-nü arüh tphahchonung. Arüh yola amüthseh-uba ko athsenguba tsü kyopehnung ko longlümsohnung.

³⁴ Mürong longla pühnü singdong retsucho kyo, ko Lebanon la sing atsauba mii khülucho kyo, Abüdongba-nü arüh retsunung!