IBRIRÜ 9 - AMÜSA BAIBEL (BSI)

Limih ko Ninglang Lih Amübü

¹ Akhudiba azengchotacho la mübünung yuzeng zehle ko nyitsarünü külüpcho amübü chah nengdang zehle.

² Shükuh khüdu thsacho, ko akhudiba chongsah te Amüsa Müdüm pü dsicho. Hütsüla dsi müdongsing ko Tsingrangba khyang mübücho hümdhse kehpüba tsingthsang licho.

³ Anyüuba chongsah yonglang chongsah khüdu te Amüsauba Müdüm pü dsicho.

⁴ Hütsüla Müchiji tahji hon bholu khüdu ko hon füh la manna zehpü hon-nü müshütiba Amüsa Singdi khüdu, Aron ja chah anu chipü ko yuzeng lungtpah anyüh licho.

⁵ Singdi michah tsü Cherufim aqonü achomang pümji tsü phati licho. Ta ade aranü changnah yonung bekhyah mah.

⁶ Hütsüri tsü hita küdang lile. Bebürüti tsü arüh dikehba nguchinung nyümong müthe chongsah akhudiba la tsü züdure.

⁷ Ta amichahba bebüba du kang la khüdupi müyurünü mümüdhepü shitpahcho münyiti nengdang Tsingrangba mübünung ashüh bipü züdure.

⁸ Amüsauba Müdüm la züdunung tsü akhudiba chongsah litashilü lang khangthru mühlepü Anbü Amüsanü tsidsa yore.

⁹ Hiba tsü shang hiba nengdang adüzü khüdu lile. Hütsü adüzü amübü ko kanglungrünü Tsingrangba khyang mübücho khunü nyitsarü lasih adekheng mükangcheh,

¹⁰ tunüo hütsü tsuba, yongba, ko apa ayah müsacheh khüdu due. Hiri apüm amülichiba asi Tsingrangba-nü mükülüp-pah-ede amichah ayah yuzeng due.

¹¹ Ta hila liba atsa Amichahba Bebü roh-i Khrista ropehko. Abinü dikehba shükuh tsü adiu ko alaa apisaba; hiba hi nyitsarünü thsacho shükuh mah, adüzü hiba athricho limih yola müzeh.

¹² Khrista-nü shükuh tsü khu amüsauba la tsü lede nengdang khüdupi züdude abinü kangmübü jünung miza ko misüpung shüh mühbi; ta abinü apu shüh khu Ihsa nengdang müchangkaba akangcheh ngujücho.

¹³ Miza ko misüpung shüh ko misüza tahcho midru tsü nyitsarü michah xahcho, ko hinü arüh amümüsa lanü müsachehjücho.

¹⁴ Khang, Khrista shühnü khütoi alaa nguchichehpü linung! Müchangkaba anbü khu abinü Tsingrangba khyang apisaba kangmübü khüdu apu akang jücho. Ihsanü akang liba Tsingrang dikehchehnung nengdang abi shühnü akhyüchah müliba ayah mübü lanü Ihsa müsachehjünung.

¹⁵ Hütsünü, sürü Tsingrangba-nü dsicho, arühnü azengchocho amüwa ngunung nengdang Khrista tsü asi anyengchocho langbürü kangcho. Akhudiba azengchotacho lide nyitsarüti thsamehba lanü za lisohnung nengdang asüba licho.

¹⁶ Yuchang khüdu tsidsanung nengdang, nyitsarüba tsü sücho yuzi jünung dhsütahre,

¹⁷ tunüo abi akang li tashi yuchang tsü amii mühle.

¹⁸ Hütsünü, akhudiba azengchotacho tsü ashüh zehpü du nguchi kangcho.

¹⁹ Akhudi, Mosa-nü nyitsarüti te yuzeng la zehcho apüm müdhesohcho. Hütsüpü abinü miza ko misüpung shüh kih la yohrütapü hyssop ko anbüh shü amoh la dhsangpü yuzeng vakha ko nyitsarüti chah xahkehjü yocho,

²⁰ “Hiba hi Tsingrangba-nü nührü khyang ashühnü shingcho azengtacho lile.”

²¹ Hütsü kyo, Mosa-nü shükuh ko mübü la bichiba kohro apüm la xahcho.

²² Ajüje, Yuzeng roh-isü, ashühnü lüpcho müsachehjüre, ko ashüh khatohpü du münyi mülang pehre.

Khrista Kangmübünü Amünyi Hitsire

²³ Ninglang liba dhingchocho kohro tsü hütsüta müsachehnung dhsütah licho. Ta ninglang kohroti tsü alaa atsauba mübü dhsütahre.

²⁴ Tunüo khehnü külüpcho Amüsa khüi adhingchocho liro, hütsüla Khrista-nü müzüdu. Ta Tsingrangba bete Ihsa nengdang ngunung ninglang yanglih tsatsa la züducho.

²⁵ Jihudarü Amichahba bebürünü kang mükhu Amüsauba Müdüm la tsü kanglungrü shüh bipü züdure. Ta Khrista-nü apu jangjang mübü jünung adrongpi müzüdu,

²⁶ hütsütarelang limih thridunü abi adrongpi chongchapü libae. Ta, ade shang bekhyah apüm achangka amünyethsa rode, apu akang mübü khu amünyiti pehjünung lede nengdang khüdupi ngusohcho.

²⁷ Nyitsarü müipi khüdupi sübae, hütsüpü Tsingrangba-nü yukhanung.

²⁸ Hütsüta nyitsarü khütango münyi hinung nengdang Khrista-nü akang mübü khüdupi jücho. Amünyi nengdang mah, ta abi yingrü khümchonung nengdang abi anyüpili ronung.