IBRIRÜ 7 - AMÜSA BAIBEL (BSI)

Bebürü Melkizedek

¹ Hiba Melkizedek hi Salem la yangthsaba ko Amichahba Tsingrangba bebürü licho. Abraham rothsa khüdula yangthsarü müyü kohpü thali royade, Melkizedek-nü abi shiro müwajücho.

² Ko Abraham-nü mahcho hirocho apüm lanü dhüre la khüdu jücho. (Melkizedek neng akhudiba adüzü tsü “Amüsaba Yangthsaba; ko abi Salem la Yangthsaba thsachonü abi neng adesü, Yangtsa Yangthsaba püsü dsicho.”)

³ Melkizedek atpa Au mahkhang ajü amü süsü mühle; abi asurocho ko asücho tu mühle. Abi Tsingrangba Tsurü kyo lede bebürü lile.

⁴ Abi khütoh-inang lümdhing! Ihsa jümürü anengkhong Abraham nüsü rothsala mahchocho apüm lanü dhüre nohlüm jücho.

⁵ Israel nyitsarüti, abürü nyitsarü ko Abraham chahnü trahchochoti thsanye, arüh chahnü dhüre la khüdu khyübülungnung Levi chahnü trahchochoti bebürü te yuzengnü mülacho.

⁶ Melkizedek tsü Levi chahnü trahchocho mah, ta abinü Abraham, sünü Tsingrangba anyengchocho khyüchocho, abi chahnü dhüre la khüdu khyücho ko abi müwajücho.

⁷ Ajühbong tsü akhyüchobong tenü adiuepü müdhele.

⁸ Bebürü yolalü, dhüre la khüdu tsü asüba nyitsarünü khyüchocho; ta Melkizedek lahpilü, dhüre la khüdu tsü amüsa yunü yocho roh-i, amüsübanü khyüchocho.

⁹ Ko yonungnü, khode Abraham-nü dhüre nohlüm jücho, Levi (sü hungnü dhüre nohlüm khyüchocho) abinüsü hütsü jücho.

¹⁰ Melkizedek-nü Abraham shirüde Levi müsuroecho.

¹¹ Hiba hi Levirü bebü nguchi khu Israelrü khyang yuzeng tsü jücho. Levirü bebü nguchi tsü pisarelang, Aron chahnü mah, ta Melkizedek mülihba tsü jünung müdhsütahcho.

¹² Tunüo khode Bebü mülitanang, yuzeng lasü amülichi chüronung kangre.

¹³ Ko Ihsa Abüdongba, sü nengdang hiri yorü, abi hung pa khüdu lanü, ko abi hung lanü süsü bebürü müthsadhing.

¹⁴ Abi Juda hung lanü surochoepü atsidsae; ko Mosa-nü bebürüti nengdang chode hiba hung hi müdangchi.

Melkizedek kyo Bebürü Apa

¹⁵ Khode bebü apa khüdu Melkizedek kyo chürocho, hütsünü alaa atsidsau kangsohcho.

¹⁶ Abi nyitsarü yuzeng yangthsa khunü mah, ta müchangkaba akang zii khu bebürü khüdu kangcho.

¹⁷ Tunüo amüsa yunü yore, “Melkizedek chung la, nüh müchangkaba bebürü.”

¹⁸ Hütsünü yuzeng ahiba tsü khyümüicho, tunüo hütsü sumüzeh ko akhyüchah mühle.

¹⁹ Tunüo Mosa yuzengnü tusü apisa mükangsoh. Ko ade alongdi atsau khüdu khüi khu Ihsa Tsingrangba amünyeh wünung hütsü jo lile.

²⁰ Hütsü chah lahkeh, Tsingrangba yuchüm khüdu lile. Aparü bebürü kangsohde hütsütari yuchümba mülicho.

²¹ Yuchümnü Jisu Bebürü kangde, Tsingrangba-nü abi te hita yocho: “Abüdongba-nü yuchümko ko alasih mümülichinung: ‘Nüh lede khyang bebürü kangnung.’ ”

²² Hinü Jisu tsü azengchocho atsauba kangsohre.

²³ Atsichola adrong bebürü jehcho, tunüo asübanü arüh nguchi mütozah nguchinung lanü yaticho.

²⁴ Ta Jisu lidu lire, ko abi bebü nguchi sü chahsü müphungkehjüre.

²⁵ Hütsünü, sürü Tsingrangba yang abi khu khümchonung rorünang, ade ko lede abi akohba lile, tunüo Tsingrangba te arüh nengdang kihchinung abi lede lile.

²⁶ Hütsünü, Jisu tsü Ihsa dhsütah desahnung Amungthriba bebürü. Abi amüsa; abi chah amünyi mahkhang mülang mühle; münyirü yolanü abi pathsa throcheh yohpücho ko ningti michah küdusohcho.

²⁷ Abi aparü amungthri bebürü mükyo; abi apu münyi nengdang akhu, ko nyitsarüti münyi nengdang kangmübü nyümong müthe jünung müdhsütah. Abinü apu akang jüchonü, lede nengdang kangmübü khüdu jüko.

²⁸ Mosa Yuzengnü amüpisa nyitsarü amungthriba bebü thsanung throcho; ta yuzeng tenü aka ro Tsingrangba anyengchocho yuchüm zeh, lede nengdang apisa kangsohba Atsudhre throchehcho.