IBRIRÜ 6 - AMÜSA BAIBEL (BSI)

¹ Hütsüeko Ihsanü khristan yusi adikeh adoba pehjüpü alümjing adoba yang bekhu wünung. Amükhyu nguchi lanü zanung; Tsingrangba yudsinung, baptiba nengdang adoba ko khehnü nyümkehba, asücho lanü kangchehba ko müchangkaba yukhaba nengdang;

² adelü Ihsanü adikeh hütsü nengdang müchochinung.

³ Ihsanü bekhu wünung! Ko Tsingrangba-nü mülakhang Ihsanü hi nguchinung.

⁴ Tunüo sürünü arüh yudsi pehjücho, hütsüri khüta lasih thsamülasoh nüli ronung? Arüh khüdupi Tsingrangba atsingse la licho; arühnü ninglangrü jiyü müyahdhingko ko arüh nohlüm Anbü Amüsa khyüchoko;

⁵ arüh akang khu Tsingrangba yu tsü atsaepü müdheko, ko arühnü aronung shang ziitisü müdheko.

⁶ Hütsüpü arüh yudsi pehjücho! Arüh lasih thsamülasoh nüli ronung tsü amükohnung, tunüo arühnü Tsingrangba Tsurü thali hamkehre ko yangbe te misha ashah khyüsohre.

⁷ Alih khüi chah tsing adrongpi ro züro ko sürünü yuthsahro, arüh khyang tsuyongnung chiro, hütsü Tsingrangba-nü müwajüre.

⁸ Ta hütsüla zeng ko za chikhang, hütsü amii mühle; hütsü Tsingrangba chokehchola dhsürü la lile ko michangnü changjünung.

⁹ Ta shangrüti, ihrünü hita chonye, nührülü tsanung longdire. Nührü akangcheh amüwa atsau lilepü ihrünü müdhele.

¹⁰ Tsingrangba yuje müchorü mah. Nührünü nührü jünirü khristanti te nguchi atsa nguchicho, mahkhang abi khyanglangnü amüi ngusohcho ade yingcheh jüyaba nengdang abinü münbüchünung.

¹¹ Nührünü longdiba tsü yuje tikehnungthsa nührü müipinü palu alongphi tsü achangchi yohpünung amülah lile.

¹² Ihrünü nührü adsere mükangsohnyüre, ta Tsingrangba anyengchocho nguchehnungthsa sürünü yudsicho, ko rangchocho arüh kyosohnyüre.

Tsingrangba Anyengchoba Yuje

¹³ Khode Tsingrangba-nü Abraham te abi anyengchoba külüpcho, abinü tu nyengchocho hütsü nguchinung yuchümcho. Apu tenü süsü adiu mülichonü, abinü yuchümde apu neng bichicho.

¹⁴ Abinü yocho, “Ihnü nüh müwajünung ko khütang trahchosohnung Ihnü nyengchore.”

¹⁵ Abraham-nü rangchochonü Tsingrangba-nü tu nyengchocho hütsü ngucho.

¹⁶ Khode nyüh khüdunü yuchümnang, abinü apu tenü adiuba khüdu neng dangchi yuchümre, ko hütsünü khiyu apüm zikajüre.

¹⁷ Abinü nyengchocho ngunungrüte, abi nahdhingkeh khodesü mümülichichehnungepü khahkhah müdhesohnyüre; hütsünü abinü anyengchoba la yuchüm zehsohcho.

¹⁸ Hinyi la Tsingrangba-nü mümülichichehnung, ko mürakhehchehnung. Hütsünü Ihsa abi te khümcho lirütinü Ihsa bete alongdi khyangpüjüba nengdang drengdreng romehnung thsüchire.

¹⁹ Hiba alongdi hi Ihsa akang nengdang amütsengyehsing adrengdreng khüdu kyole. Hiba hi ninglangrü amübükuh ayonglang züduba kitising lile.

²⁰ Hütsüla Jisu-nü Ihsa nengdang Ihsa müngu züduko, ko lede nengdang Melkizedek chung la amungthriba bebü kangcho.