IBRIRÜ 4 - AMÜSA BAIBEL (BSI)

¹ Ade, abinü yoba akyahshang tsü ngunung nengdang Tsingrangba-nü Ihsa te nyengchoko. Hütsüeko nührü süsü hütsüba anyengchocho akyahshang tsü müngupü mülinung nengdang, Ihsanü müzahmükinung.

² Arüh kyo Ihsanüsü Yuse Atsa tsü yuchiko. Arühnü yusi tsü yuchicho, ta hütsü arüh nengdang tu müjingcho, tunüo arühnü hütsü yuchide yudsinü mükhyücho.

³ Hütsünü, Ihsa sürünü yudsiro, Tsingrangba-nü nyengchoba akyahshang tsü khyüchore. Abinü yocho kyo: “Ih zichüronü yuchümcho: ‘Ihnü arüh khyang akyahshang jünung liba lih la tsü arüh khodesü müzüdunung!’” Abinü limih thridenü, abi nguchi thümpehpü linye abinü hi yocho.

⁴ Tunüo Amüsa yula dhünyeh nyümong nengdang hi yo lile: “Adhünyeh nyümong Tsingrangba-nü nguchi apüm lanü kyahshangcho.”

⁵ Hütsüba nengdang thali yore: “Ihnü arüh khyang akyahshang jünung liba lih la tsü arühnü khodesü müzüdunung.”

⁶ Yuse Atsa akhu yuchirünü akyahshang hütsü mükhyücho, tunüo arühnü müyudsi. Aparülü hütsü khyüchonung mülacho.

⁷ Hütsü Tsingrangba-nü nyümong pathsa khüdu, khüi, “Chünye” pü yoro hütsü yuzi lile. Kang adrong khanglang amüsa yula akhulang yocho roh-i abinü David khu chocho: “Chünye nührünü Tsingrangba yuva yuchikhang, lasih müküp tüli.”

⁸ Tsingrangba anyengchocho akyahshang tsü Joshua-nü nyitsarü khyang jüpü lilang, Tsingrangba-nü nyümong pathsa nengdang akhanglang müyoba thsako.

⁹ Ta, Tsingrangba adhünyeh-u nyümong kyahshangcho kyo nyitsarüti nengdang akyahshang khüdu nying lile.

¹⁰ Tunüo Tsingrangba akyahshang roh-i sünü hiba anyengchocho akyahshang tsü khyüchoro, abinü apu nguchi lanü kyahshangnung.

¹¹ Hütsüeko, arüh yudsi mülichonü shohjocho kyo, Ihsa süsü müshohjonungthsa, Ihsanü hütsüba akyahshang tsü khyüchonung Ihsa kohcho nguchinung.

¹² Tsingrangba yu tsü akang ko adhidhü ko anyülangpü noh tenü akoh-u. Hinü akange anbü, chunghati ko rühthoh apüm khakhure. Hinü nyitsarü lümcho ko mürucho apüm khakhu müdhere.

¹³ Tsingrangba tenü rangnung tusü mühle; athricho lüpcho abi nah te misha lile. Ko abi te Ihsa atümung palu nguchi hüm nguchisohnung lile.

Jisu tsü Amungthriba Bebü Arangcheh

¹⁴ Hütsüeko, Ihsanü khyüchoba yusi tsü drengdreng yohponung. Tunüo, Tsingrangba Tsurü Amungthriba Bebü Jisu tsü Tsingrangba lichah wüko.

¹⁵ Ihsa Amungthriba Bebü tsü Ihsa sumüzeh nengdang dhsa lümjüba khüdu mah. Ta Ihsa Amungthriba Bebü tsü lang apüm la Ihsa roh-i thsadsücho, ta abinü münyi müshitpah.

¹⁶ Hütsüeko, Ihsanü longlangnü Tsingrangba achomang pümji yang wünung. Hütsüla Ihsa dhsütahde trochehnungthsa yanglilüm ko achomang Ihsanü ngunung.