IBRIRÜ 3 - AMÜSA BAIBEL (BSI)

Mosa tenü Jisu Adiu

¹ Tsingrangba-nü dsiba khristan jünirüti! Ihsanü khyüchoba yudsi Amichahba Bebü thsanung Tsingrangba-nü müthehba Jisu lümdhing.

² Tsingrangba kuh la Mosa longlangcheh licho kyo, Tsingrangba sünü hiba nguchi nengdang abi throchehcho abi chah longlangcheh licho.

³ Kuh abükyü tenü athsabanü alaa adhichi ngure. Hütsü kyo Mosa tenü Jisu adhichi deenü adiu.

⁴ Ajüje kuh apüm khürünü thsare, ta lüpcho thsaba tsü Tsingrangba.

⁵ Tsingrangba kuh la Mosa tsü longlangcheh dikehrü khüdu licho, ko Tsingrangba-nü aronung la yonung liba nengdang abinü yuzi jücho.

⁶ Ta Khrista-lü Atsurü roh-i Tsingrangba Kuh michah longlangcheh axükümrü licho. Ihsa alongdi la rezeh ko longlangcheh likhang Ihsa abi kuh.

Tsingrangba Nyitsarü Nengdang Akyahshang

⁷ Hütsünü, Anbü Amüsanü yocho roh-i: “Chünye nührünü Tsingrangba yuva yuchikhang,

⁸ Nührü jümürü Tsingrang nyüm lipilih la lide abi thsadsücho roh-i, nührü hong tüzi.

⁹ Ihnü kang yüre tu nguchicho hütsü arühnü ngunye, hütsüla arühnü Ih thsadsüchoepü Tsingrangba-nü yore.

¹⁰ Hütsünü Ihnü hütsüri nyitsarü te zichüronü yocho, ‘Arüh lede yocho mühnyire ko I yuzeng mükhyüre.’

¹¹ Ih zichüronü yuchümcho: ‘Ihnü arüh khyang akyahshang jünung liba lih la tsü arüh khodesü müzüdunung!’”

¹² Jünirüti, nührü yola süsü amünyi ko müyudsiba lasih thripü akang liba Tsingrang chahnü müshojonungthsa müzahng.

¹³ Ta, nührü süsü amünyinü thsüyohchü lasih mümüküpnungthsa, Ihsa te amüsa yunü “Chünye” pü yo tashi, nyümong mükhu nührü khüdunü khüdu trotaang.

¹⁴ Tunüo Ihsa adikehde roh-i achangchi drengdreng marehkhang, Ihsa Khrista la trümtarüe.

¹⁵ Amüsa yunü yoba tsü hi: “Chünye nührünü Tsingrangba yuva yuchikhang, nührü jümürütinü Tsingrangba nyümba roh-i, nührü lasih tümüküp.”

¹⁶ Tsingrangba yu yuchipü abi nyümba tsü sürü thsacho? Arüh tsü Ijip lanü Mosa-nü nüchehrüti atümung thsacho.

¹⁷ Sürü te Tsingrangba kang yüre zichürocho? Sürünü amünyi shitpahpü lipilih la sücho arüh tsü lile.

¹⁸ Tsingrangba-nü yuchüm khüdunü, “Ihnü arüh khyang akyahshang jünung liba lih la tsü arüh khodesü müzüdunung” pü yoba tsü sürü nengdang thsacho? Anyümrüti nengdang chocho.

¹⁹ Hütsü, arühnü müyudsicho khu hütsüla müzüduchehcho Ihsanü ngure.