IBRIRÜ 2 - AMÜSA BAIBEL (BSI)

Akangcheh Arangcheh

¹ Hütsünü Ihsanü yuchiba yuje tsü müfotsinungthsa, Ihsanü alaa drengdreng marehbae.

² Ihsa jümürüti khyang ninglang riwürünü jüba yusi tsü yuje-epü ngure, ko sünü hütsü mübichicho ko mühnyicho abi aleng akhingchi tsü ngucho.

³ Hitoh-i akangcheh arangcheh Ihsanü thrüchahchüpehkhang, tu khüta Ihsanü tsiphunung? Hiba akangcheh hi Abüdongba apunü akhu züdecho, ko sürünü yuchicho arühnü Ihsa te yuje-epü yuzi jücho.

⁴ Hütsüde tsü Tsingrangba-nü thsayahiya langkhüru ko amüdhethsa nguchinü ko apunü lümchonü Anbü Amüsa Jiyü changtajo yuzi alaa arüh khyang lahkehjücho.

Ihsa Akangcheh yang Nübong

⁵ Aronung liba limih asi, Ihsanü chochiba limih michah yangthsanung Tsingrangba-nü ninglang riwürüti khyang müjü.

⁶ Amüsa yula yocho roh-i: “O Tsingrang, nühnü lümdhingnungthsa nyitsarü hi tu; Nyitsarü khüdu du, abi xükümnungthsa tu?

⁷ Nühnü azachah nengdang abi ninglang riwürüti tenü apohkiba külüpcho; nühnü ahechi ko adhichinü abi khyang kuthri thrijücho, ko apüm michah abi yangthsarü kangsohcho.

⁸ Tsingrangba-nü nyitsarü apüm michah yangthsarü kangsohchoepü yore” hila lüpcho zehle. Ta nyitsarünü apüm michah thsacho ihrünü müngure.

⁹ Ta Ihsanü Jisu, sü azachah nengdang ninglang riwürüti pohki külüpcho, hütsünü Tsingrangba achomang khu atümung nengdang sünungthsa kangcho abi ngure.

¹⁰ Tsingrangba sünü apüm thriro ko riki yohpüro, abi ahechi changtanung atsurü adrong noronungthsa, abinü chongcha khu Jisu tsü dekhing kangsohnung. Tunüo arüh akangcheh yang nübong tsü Jisu lile.

¹¹ Abinü nyitsarüti arüh münyi lanü müsachehjüre, ko abi ko sürü müsachehjücho arüh atümung Au khüdu du. Hütsünü arüh te Jisu-nü jünirüti pü dsinung müshahcho.

¹² Abinü Tsingrangba te yorü: “Ihnü I jünirüti te nühnü tu nguchicho hütsü yonung; Ihnü arüh yola nü neng senung.”

¹³ Abinü hisü yocho, “Ihnü Tsingrangba chah I alongdi yohpünung. Ko hisü yorü, Ih hila Tsingrangba-nü jücho tsurü yola lile.”

¹⁴ Tsuzarüti tsü shutsa ko ashüh thsachonü, Jisu apusü arüh kyo kangcho ko nyitsarü yangthsa khyüchocho. Abinü hi nguchiba tsü abi sücho khunü Motsing, sü asü michah tase liro abi thsangnyangjünung,

¹⁵ ko hütsütanü arüh akang ayung asüba adrü la ayurü kang licho arüh lehchehnung.

¹⁶ Tunüo abinü troba tsü ninglang riwürüti mah pü tsidsako. Ta amüsa yunü yocho roh-i, “Abinü Abraham chahnü trahchochoti trore.”

¹⁷ Hi adüzü tsü abi Tsingrangba dikehba la nyitsarüti münyi mülang pehjüsohnung nengdang arüh longlangchehba ko yanglilüm kehba Amichahba Bebü kangnungthsa, lüpcho la abi jünirüti kyo kangnung dhsütah licho.

¹⁸ Adelü sürü thsadsücho arüh abinü trochehle, tunüo apusü thsadsücho ko chongchacho.