IBRIRÜ 11 - AMÜSA BAIBEL (BSI)

Yudsi

¹ Yudsi tsü Ihsanü longdicho nengdang atsüptsi ko amüngucho nengdang müdhecho.

² Yudsi khu papade nyitsarütinü Tsingrangba chahnü alanglang ngucho.

³ Ninglih tsü Tsingrangba yunü thrichoepü Ihsanü yudsi khu müdhere, hütsünü tu nguro hütsü amünguba lanü külüpcho.

⁴ Yudsinü Abel-nü Tsingrangba khyang Kain tenü kangmübü atsauba khüdu jücho. Abi yudsi khu Tsingrangba chahnü abi alanglang ngucho, tunüo Tsingrangba apunü abi amübü khyüchocho. Abel yudsinü abi sünye ade yingcheh chore.

⁵ Yudsinü Enok müsüsohcho. Ko Tsingrangba yanglang nükeh tsicho, ko sünüsü abi müngu, tunüo Tsingrangba-nü abi nükeh tsicho. Enok münükeh tside abinü Tsingrangba künyangsohchoepü amüsa yunü yore.

⁶ Sünüsü yudsi müzehpü Tsingrangba künyangsohnung mükoh, tunüo sünü Tsingrangba yanglang roro abinü Tsingrangba lile ko abi yangchirü jiyürepü yudsibae.

⁷ Yudsinü Noa khyang aronung liba amünguba nengdang Tsingrangba amüzahnung yu yuchisohcho. Abinü Tsingrangba yochonyi Singkong khüdu külüpcho ko hütsüla abi ko akukhi khümchocho. Abi yudsinü limih mülangjücho, ko yudsi khu roba amüsaba kangcho.

⁸ Yudsinü khode Tsingrangba-nü abi khyang anyengchocho limih jünung lang shemüsunung dsicho, Abraham-nü yochonyicho. Abinü abi khüilang würünang mümüdhepü abi yang pehjücho.

⁹ Yudsinü Tsingrangba-nü jünung nyengchoba limih la tsü shirü khüdu roh-i licho. Abi te müjang Tsingrangba anyengchocho thsiking khyürü Isak ko Jakob nyüh yola shükuh la licho.

¹⁰ Amüdongkehsing atsa la Tsingrangba-nü thri thsacho yangdi khüdu nengdang Abraham-nü yingcho.

¹¹ Yudsinü, Abraham dee shinye ko Sara azarü hinung khunye Au khüdu kangnung kohsohcho. Abinü anyengchocho yohpünung Tsingrangba chah longlangcho.

¹² Abraham shutsa lalü abaji kungpü linye, abi chahnü ningchah chenghi kyo ko kihbekhüm la lihpi kyo mükhilong trahchocho.

¹³ Hiri nyitsarü apüm yudsi la sücho. Tsingrangba-nü nyengchocho tsü arühnü müngu, ta arühnü ashulanü arüh ngu khyüchocho, ko arühnü limih la arüh shuparü ko arümchirüepü misha nyengchocho.

¹⁴ Sürünü hütsü roh-i yoro, arüh palu limih khüdu yangchirepü ngusohre.

¹⁵ Arühnü pehjüba limih nengdang mülüm; arühnü lümlanglü, thalipü thsanung.

¹⁶ Ta, arühnü atsauba ninglanglih nengdang mükhyah lümcho. Hütsünü Tsingrangba-nü arüh shulüm abi arüh Tsingrang ko dsinung müshahre, tunüo arüh nengdang abinü yangdi khüdu rungnüm lile.

¹⁷ Yudsinü, Tsingrangba-nü Abraham thsadsüde, abinü atsudhre Isak kangmübü khüdu jünung kohsohcho. Tsingrangba-nü anyengchoba tsü Abraham te külüpcho, ta abinü atsudhre khüdu du tsü mii amübü jünung künyang licho.

¹⁸ Tsingrangba-nü abi te yocho, “Ihnü nyengchoba tsü Isak khu trahchonung.”

¹⁹ Tsingrangba-nü asücho lanü Isak kanglisohnungepü Abraham-nü yudsicho ko, yonungnü, Abraham-nü Isak asü lanü thali ngucho.

²⁰ Yudsinü, Isak-nü aronung amüwa tsü Jakob ko Esau nyüh khyang jünung nyengchocho.

²¹ Yudsinü, Jakob-nü asünung bekhyah la Josef tsurüti nyitsarü mükhu müwajücho. Abinü abi ja chah ngakeh Tsingrangba mübücho.

²² Yudsinü, Josef-nü abi sünungthsade, Israelrü Ijip lih pehjünung nengdang yocho, ko abi me rangnung nengdang athülaba jücho.

²³ Yudsinü, Mosa tpurünü abi suropü choo asang rang yohpücho. Arühnü abi tsah tsacho ngunü yangthsaba yuzeng müdrücho.

²⁴ Yudsinü, khode Mosa zicho, abi Farao tsulatpü tsurüepü dsinung abinü dhsonglicho.

²⁵ Abinü akhikyah chah amünyi la künyangküshinung tenülü Tsingrangba müyurüti te chongchanung throchehcho.

²⁶ Ijip kuthsi apüm tenü Mesia nengdang chongchanung tsü awübaepü abinü khichicho, tunüo aronung jiyü chah du dhingcho.

²⁷ Yudsinü, Mosa-nü yangthsaba zichürocho müdrüpü Ijip limih pehjücho. Abinü amünguba Tsingrang ngunü thalinung dhsonglicho.

²⁸ Yudsinü, asü riwürünü Israelrü aukhurüti mümüpsehsohnung nengdang abinü Phungkhu Thsüti ko kukhang chah ashüh xahkehba külüpcho.

²⁹ Yudsinü, Israelrünü alih akung la roh-i, amoh kihdi keh tsicho; khode Ijiprünü hütsü roh-i nguchinung müküpcho, kihnü arüh münyopehcho.

³⁰ Yudsinü, Israelrünü Jeriko lungtbü nyümong dhünyeh mükangde khülucho.

³¹ Yudsinü, nahtrahnaxenglatpü Rahab, Tsingrangba yocho mühnyirü yola müchangcho, tunüo abükyünü Israelrü füzathsarü nüyohcho.

³² Ihnü tu alaa yonung? Ihnü Gideon, Barak, Samson, Jeftha, David, Samuel ko azikehrüti nengdang chonung bekhyah kükyo mühle.

³³ Yudsinü, arühnü limih apüm te khatacho ko kohcho. Arühnü tu yuje hütsü nguchicho ko Tsingrangba anyengchocho khyüchocho. Arühnü kihkhünying be khangtijücho,

³⁴ adrünung michang mehsohcho ko nohshengnü kyüsehnung lanü tsichehcho. Arüh sumüzehcho, ta rezeh kangcho; arüh khatala athrungrü ko arorüh kangcho.

³⁵ Yudsinü khingkurünü arüh tsutpurü asücho lanü kanglisohcho. Khürü akang atsauba la kanglinung nengdang mülehchehsohpü dhsümthsesohcho.

³⁶ Khürü müthsamünyüjü xüpnahcho, ko khürü tbolunü xohpü akhangtikuh la yohpücho.

³⁷ Arüh lungnü müpsehcho, arüh anyüh kang xarüpcho ko nohshengnü kyüsehcho. Arüh san mahkhang miza küp khyüpü chongcha, dhsümthse ko mütsa bichicho.

³⁸ Arüh nengdang limih hi amükhyahnung mükehcho! Arüh atsichirü kyo lihpi lih ko rangmü la lihkhi ko lungkhi la li rachicho.

³⁹ Hiri apüm arüh yudsinü kohcho! Ta Tsingrangba-nü nyengchocho arühnü müngu,

⁴⁰ tunüo Tsingrangba-nü Ihsa khyang lümchung atsauba khüdu licho. Abi alümcho tsü Ihsa tenü za arüh apisa mükangsohnung.