IBRIRÜ 10 - AMÜSA BAIBEL (BSI)

¹ Yuzeng tsü aronung liba yujeba kohro tsatsa tsü mah, ta arüh nbükhüm khüdu du lile. Akyokyo kangmübü tsü kang mükhu mübüre. Khang, Tsingrangba yanglang rorüti khüta yuzeng tsünü pisa kangsohnung?

² Tsingrangba mübürü tsü arüh münyi lanü müsachehjürelang, arühnü amünyi mülang mülümchehbae ko kangmübüti apüm nyehlibae.

³ Ta kang mükhu kangmübü tsünü nyitsarü khyang münyi du lümchehsohre.

⁴ Tunüo misüpung ko miza shühnü khodesü amünyi hitsinung mükoh.

⁵ Hütsünü, Khrista limih lang ronungde abinü Tsingrangba te yocho: “Nühnü kangmübü ko amübü mükhyünyü, ta nühnü I nengdang füpüm khüdu rungnümcho.

⁶ Amünyi hitsinung kanglungrü trüp bholu chah mübüba ko kangmübü la nühnü mükünyangre.

⁷ Hütsüde Ihnü yocho, ‘Yuzeng vakhala thrah licho kyo, O Tsingrang, nü lümcho nguchinung Ih hila lile.’ ”

⁸ Akhudi abinü yocho, “Amünyi hitsinung kangmübü ko amübü mahkhang bholu chah kanglungrü trüp mübüba nühnü akhyünyüsü mükhyünyü mahkhang künyangsü mühle.” Yuzeng roh-i hiri kangmübü apüm mübünye abinü hita yocho.

⁹ Hütsüpü abinü yocho, “O Tsingrang, nü lümcho nguchinung Ih hila lile.” Hütsüta Tsingrangba-nü ahiba kangmübüti apüm pehjüpü Khrista kangmübünü mülihcho.

¹⁰ Tsingrangba-nü abi khyang tu nguchisohnyücho, hütsü Jisu Khrista-nü nguchichonü, lede nengdang khüdupi abi akang amübü jücho khu Ihsa amünyi lanü müsachehcho.

¹¹ Bebürünü abi nguchi nyümong mükhu dikehnü akyokyo kangmübü tsü jüre, ta hütsünü amünyi mühitsichehre.

¹² Ta Khrista-nü amünyiti nengdang lede shulüm khüdupi amübü jüpü Tsingrangba tsalangthring pümcho.

¹³ Hütsüla abi rorüti Tsingrangba-nü ajing dhrümsing mükangsohde yingre.

¹⁴ Hütsüta, kangmübü khüdu khu abinü amüsachehrüti pisa kangsohcho.

¹⁵ Ko Anbü Amüsa nüsü Ihsa te yuzi jüre. Abinü akhudi hi yore:

¹⁶ “Abüdongba-nü yore, aronung nyümongti la Ihnü arüh te külüpnung azengchotaba tsü hi linung: Ihnü arüh lasih la I yuzeng yohjünung ko hütsüri arüh lüm la thrahnung.”

¹⁷ Hütsüpü abinü yorü, “Adelü Ihnü arüh münyi ko nguchi amütsati mülümchehnung.”

¹⁸ Hütsünü khode mülang pehjünang, kangmübü tsü adelü müdhsütahnung.

Ihsanü Tsingrangba Shündhün Wünung

¹⁹ Hütsüeko jünirüti, Jisu Khrista sücho khu Amüsauba Müdüm la züdunung Ihsa tu müthsungkyang.

²⁰ Akitising, hütsüla apu fü khu lang asi, akang liba lang khüdu abinü Ihsa khyang khangthrujüko.

²¹ Tsingrangba kuh dhingyehrü Bebü amülah khüdu Ihsa khyang jo lile.

²² Hütsüeko Ihsanü lasih apümnü ko yuti khu, thsameh lümba lanü müsachehba lasih ko kih amüsengnü mütsahcho afü zeh Tsingrangba shündhün wünung.

²³ Ihsanü nyengchoba alongdi la khahkhah ramehnung, tunüo Tsingrangba-nü abi anyengchocho yohpünung Ihsanü longlangre.

²⁴ Amüi ngusohnung khüdunü khüdu te trota ko atsa nguchinü khüdunü khüdu khichitanung.

²⁵ Lede shirüta liba yangthsa Ihsanü müpehjünung.Ta Abüdongba Nyümong amünyethsa rocho müdhe, Ihsanü khüdunü khüdu alaa thsüchitanung.

²⁶ Ihsa te yuje tsü müdhesohko khanglang Ihsanü ahsa amünyi shitpahkhang, tu kangmübünü münyi pehba mülinung.

²⁷ Adelü aronung liba yukhaba ko Tsingrangba nyümrü changjünung adrünung michang nengdang drüseh yingnung du nying lile!

²⁸ Sünü Mosa yuzeng mühnyiro, nyüh anyüh asang yuzinü abi müchomangpü süsohre.

²⁹ Khang Tsingrangba Tsurü müthsamünyüba tsülü khütanung? Tsingrangba azengchocho shüh khüinü abi amünyi lanü müsachehjüro, hütsü mükhimüchorü khüta? Achomang Nbü müthsamünyürü khüta? Abi akhingchi khütoh-i amütsau lengro lümdhing!

³⁰ Tunüo sünü hita yocho Ihsanü müdhele, “Ihnü rühyangnung, Ihnü thali jünung” ko sünü hisü yocho, “Abüdongba-nü abi müyurü yukhanung.”

³¹ Akang liba Tsingrang kheh la shohjonung tsü dee adrünung khüdu!

³² Atsicho la nührü khüta licho hütsü lümchehng. Hütsüri nyümongla, Tsingrangba atsingse nührü chah ropü khanglang, nührü khütang chongchako, ta hütsünü nührü mükoh.

³³ Nührü khüdupi misha müthsamünyücho, ko mütsa bichicho ko khüdupi hütsü roh-i khingchirü yola zehnung nührünü rungnüm licho.

³⁴ Nührünü arangyoh la lirü chongcha changtacho, ko khode nührü licho apüm khyüjücho nührünü akohsha künyangseh rangchocho, tunüo lede müthsangnyangba lango atsauba khüdu nührü nengdang lilepü müdhecho.

³⁵ Hütsüeko nührü suh tüzah, tunüo hütsünü jiyü arangcheh khüdu hirore.

³⁶ Tsingrangba lümcho nguchinung ko abinü nyengchocho khyüchochehnungthsa, nührünü rangchonung adhsütah.

³⁷ Tunüo, amüsa yunü yocho roh-i: “Akhikyahchah lipü, sü ronung liro abi ro chihnung; abi mümünunung.

³⁸ Ta amüsarüti yudsinü akang linung; ta arüh khürü shehlikhang, Ihnü abi te mükünyangnung.”

³⁹ Ihsa shehli tsiba ko chahpehba nyitsarüti roh-i mah, ta Ihsa yudsinü khümcho lile.