IBRIRÜ 1 - AMÜSA BAIBEL (BSI)

Atsurü khu Tsingrangba Yu

¹ Atsicho la, Tsingrangba-nü azikehrü khu adrongpi Ihsa jümürü te lang adrongnü chotako,

² ta hiba achangka nyümongla abinü Ihsa te Atsudhre khu chotacho. Abi khu Tsingrangba-nü limih thricho ko Tsingrangba-nü thsiking khyürü thsanung abi throchehcho.

³ Tsingrangba ahechi tsü abinü tehmüla ngusohre; abi tsü Tsingrangba kyosangle, ko athrijungcho tsü abi yu zii khu lisohre. Amünyi tsurü münyi mülang pehba ngusohko khanglang, abi ninglang yanglih la amungthriba zii, Tsingrangba tsalangthring pümcho.

Tsingrangba Tsurü Mülahcho

⁴ Arüh neng tenü Tsingrangba-nü abi khyang jüba neng tsü adiuba thsacho kyo, Atsudhre tsü ninglang riwürü tenü adiuba thricho.

⁵ Tunüo Tsingrangba-nü abi ninglang riwürü sütesü hita müyo: “Nüh I Tsurü, Chünye Ihnü nüh nümüsure.” Mahkhang Tsingrangba-nü riwürü sü nengdangsü hita müyo, “Ih abi Au kangnung, ko abi I tsurü kangnung.”

⁶ Ta Tsingrangba-nü limih yang Atsudhre aukhuba müthehde, abinü yocho: “Tsingrangba riwürüti atümungnü abi mübünung.”

⁷ Ta ninglang riwürüti nengdang Tsingrangba-nü yocho, “Tsingrangba-nü apu riwürüti nyübong, ko abi dikehrüti mihmüle külüpre.”

⁸ Ta Atsudhre nengdanglü Tsingrangba-nü yocho, “O Tsingrang, nü Yanglih müchangkapü linung! Nühnü nü nyitsarü michah yujenü yangthsare.

⁹ Nühnü yuje müire ko arahkheh thrünyire. Hütsünü Tsingrangba, nü Tsingrang-nü nüh throchehko ko nührü shangrü tenü alaa nü khyang adhichi akünyang khüdu jüko.”

¹⁰ Abinü hisü yocho: “Abüdongba, nühnü adikehde limih thricho, ko nüpu khehnü ningti külüpcho.

¹¹ Arüh changpehnung, ta nühlü linung; Arüh atümung shü roh-i threhpehnung.

¹² Fükhüm roh-i nühnü arüh lohnung, ko shü kyo arüh mülichinung. Ta nühlü lede asusuh, ko nüh müchangkanung.”

¹³ Tsingrangba-nü abi riwürü sütesü hita müyo: “Ihnü nü rorüh nü jing dhrümsing mükangsohde, hila I tsalangthring püm.”

¹⁴ Khang, ninglang riwürüti tsü tuo? Arüh tsü Tsingrangba dikehrü anbü lile ko akangcheh ngunungrüti trosohnung Tsingrangba-nü müthehcho.