HOSEA 7 - AMÜSA BAIBEL (BSI)

¹ “Ihnü I müyurü Israelrü kyangjü thali müwajünungde, Ihnü arüh mütsa ko amünyi nguchi du ngure. Arüh khüdunü khüdu thsüyohchütare; kuh rohphoh führe; ko arühnü yanglongla mii bürü yo kengcho khyüre.

² Ihnü amünyi hiri apüm lümchehnungepü arüh thoh la müzürore; ta amünyinü arüh bhümtiko, ko hütsüri Ihnü müngupü linung mükoh.”

Yangthsaba Nyüm Arah

³ Abüdongba-nü yore, “Müyurünü yangthsaba ko abi pohki adirüti arüh rah amütsanü thsüyohchüre.

⁴ Arüh atümung athsüyohchürü ko yocho mühnyirü. Arüh thrünyitaba tsü hümdhse külüprünü aruhnung hüm tsü münyangde tala michang mütsangyohcho kyole.

⁵ Yangthsaba kuh la thsüti khyüde, arühnü yangthsaba ko abi pohki adirüti yongkhanü müchasoh dohsohre.

⁶ Ho, arühnü arüh rah tsünü taphi la kyo tahre. Müyüp arüh zichüro müci tsübümre, ko anyangnyü hütsü michang roh-i tsohphohre.

⁷ “Arüh rihlongnü longdhridhri arüh yangthsarü müpsehre. Arüh yangthsarüti khüdu khanglang khüdu müpsehre, ta sünüsü Ite arüku nengdang mükihchire.”

Israel ko Yuchoti

⁸ Abüdongba-nü yore, “Israelrü tsü aruhmüphohcho hümdhse kyole. Arühnü arüh mükangmüshü yucho chah ngakehre

⁹ ko shuparü tsünü arüh tase du khyüjürepü arühnü mülümchehre. Arüh nyümongti changka rore, ta hütsü mii arühnü mümüdhe.

¹⁰ Israelrü mülahmüshiba tsünü arühbürü nyüm züdere. Hitoi tikehnye, arühnü Abüdongba arüh Tsingrang müyangchire.

¹¹ Israel tsü athoh müzeh kuh-mümüdhrü kyole; akhu Ijiprü yang wücho hütsüpü arühnü Assyria yang shangcho.

¹² Ta uza roh-i Ihnü arüh tsiyade phati rangnung. Arüh münyi ngang Ihnü arüh khingchinung.

¹³ “Arüh ahohah! Arühnü Ih pehjüko ko Ih nyüm yako. Arüh changjünung. Ihnü arüh khümchonyücho, ta arühnü Ih mübüba tsü arahkheh.

¹⁴ Arühnü lasih lanü Ite müdangkhidangnang, ta arühnü chongnong chah chichi trare. Arühnü tsang ko yongkha nengdang kihchide müyudsirü kyo arühbürü fü tsehnahre. Arüh khüta anyümrü!

¹⁵ Ihnü arüh nümüsu rezehsohnye, arühnü Ih nyüm yare.

¹⁶ Arühnü mütozah I tenü za tase müliba tsingrang yang ximülare. Akureng singthsalu kyo arüh chah longlangnung mühle. Arüh langnürütinü hongzi chochonü arüh shühkhatoh sünung ko Ijiprünü münyodhingnung.”