HOSEA 6 - AMÜSA BAIBEL (BSI)

Nyitsarünü Lasih Müthsamülacho

¹ Müyurünü yore, “Ihsanü Abüdongba yang ximülanung! Abinü Ihsa dhsakehjüko, ta Abinü Ihsa kyangjünung; Abinü Ihsa lerohpehjüko, ta Abinü Ihsa madhsa rümjünung.

² Abinü nyümong anyüh asangla Ihsa kanglisohnung, ko Abi te Ihsa linung.

³ Ihsanü Abüdongba müdhenung müküpnung. Tsingsenung tsüpcho kyo, ko machimashü tsingnü alih dhsangjücho kyo, Abi Ihsa yang ronung.”

⁴ Ta Abüdongba-nü yore, “Israel ko Juda, Ihnü nührü te tu nguchinung? Ite nührü amüi tsü anyangnyü yingdhsa kyo changpehre; anyangnyü züchangba yingkih kyole.

⁵ Hütsünü yukhaba ko achangba yusi hipü azikehrüti nührü yang rosohcho. Ihnü nührü chahnü khyünyüba tsü atsidsa hi du.

⁶ Ihnü kanglungrü kangmübü mah, ta nührü amüthrehba amüi khyünyüre. I khyang trüp mübünung tenü I müyurünü Ih müdhesohnyüre.

⁷ “Ta Adam lih chihyeng, Ihnü arüh te zengtaba arühnü thsangnyangcho.

⁸ Gilead yangdi tsü nyitsarü amütsa ko amüpsehrü dunü jeng lile.

⁹ Bebürü tsü thseh pümba fükhohrü du kyole, Shekem la Amüsa müdüm yang züduba langla mii arühnü müpsehre. Hütsüta arühnü amütsa nguchi ahsa nguchire.

¹⁰ Israel la Ihnü adrünung nguchi nguko: I müyurünü kyothri mübünü arüh jangjang amünyi shitpahre.

¹¹ “Nührü Judarüsü, nührünü nguchiba nengdang khingchinung Ihnü bekhyah pathsa kyahcheh yohpüle.