HOSEA 5 - AMÜSA BAIBEL (BSI)

¹ “Hi nyieng, nührü bebürüti! Lasih jo nyieng, Israelrü! Nyieng, yangthsaba kukhirüti! Nührünü yuje cho yukhabae, hütsüta yukhaba tsü nührü michah küronung! Nührü Mizpa zong ko Tabor khangla uzathsacho kyo,

² Akacia yangdila shukuh asoh nührü kangko, ko Ihnü nührü khingchinung.

³ Israel tsü tunang Ihnü müdhele, I tenü rang mülichehnung. Abükyünü yuje mücho, ko amüyurünü Ih mübünung müdekheng.”

Hosea-nü Kyothri Nyüm Müzahsohre

⁴ Arüh amünyi nguchi tsünü arüh Tsingrang yang ximülanung yatire. Kyothri mübüba tasenü arüh rangyehpüle, ko arühnü Abüdongba mümüdhe.

⁵ Israel hongziba tsünü arühbürü nyüm züdere. Arüh münyinü arüh jing müthi khülure, ko arüh yola Judarü mii zeh khülure.

⁶ Arühnü Abüdongba khyang kangmübü nengdang arüh san ko misü khyüre, ta hütsünü tu atsau mükangre. Arühnü Abi müngure, tunüo Abinü arüh pehjüko.

⁷ Arühnü Abüdongba te yuje mücho; arüh tsuzarü tsü arüh yo mah. Hütsünü arüh ko arüh lih zeh changnung.

Juda Ko Israel nyüh Kahla Khata

⁸ Gibea la khata rühti mehng! Rama la roseing! Bethaven la rothsa yuva jüng! Benjaminrü, khatalang shemüsung!

⁹ Akhingchi nyümong tsehle, ko Israel changnung. Israelrüti, hi yuje tikehnung!

¹⁰ Abüdongba-nü yore, “Judarü langnürünü Israel mahko ko alih rohchoko, hütsünü I zichürore. Hütsü ngang arüh michah akhingchi kihmülüm kyo mükhakehjünung.

¹¹ Israel tsü sehchi chongchaba khüdu; abükyü lih khyüjüko, tunüo ajühnung mülirü yang abükyünü arüku chingnung wücho.

¹² Ihnü Israel michah athsangnyang ko Judarü michah achangba hirojünung.

¹³ “Israel-nü abükyü füdhsacho ngude ko Juda-nü abükyü madhsa ngude, Israel-nü Assyria yangthsaba te arüku nengdang wücho, ta abinü arüh mükyangjücheh mahkhang arüh aiha mütbajücheh.

¹⁴ Ihnü kangdinü kyo Israel ko Juda benung. Ipunü zangzang arüh rehnah pehnung. Khode Ihnü arüh tphahtsinang, sünüsü arüh mükhümchochehnung.

¹⁵ “Arüh münyi ngang kükyo chongchapü Ih müyangchide Ihnü arüh thrüchahchüpehnung. Arüh chongchadelü Ih yangchinungsü kohle.”