HOSEA 4 - AMÜSA BAIBEL (BSI)

Abüdongba -nü Israelrü Nyüm Mülangjücho

¹ Hiba lih la lirü nyüm Abüdongba-nü mülangjüba khüdu lile. Abinü tu yoro, Israel, nyieng: “Alih la longlangba ko amüi mühle, ko nyitsarünü Ih Tsingrangepü mümüdhe.

² Arühnü nyengchore ko thsangnyangre; arühnü arahkheh chore, müpsehre, führe ko nahtranahxengre. Yuzeng thsangnyangba alaa, ko müpsehba khüdu khanglang khüdu zire.

³ Hütsünü alih kungpehnung, ko hütsüla liba lüpcho sopehnung. Kanglungrü ko uzati apüm ko ngu miinü sünung.”

Abüdongba -nü Bebürü Mülangjücho

⁴ Abüdongba-nü yore, “Müyurü süsü tümülangjü mahkhang tükhata, ta I longmüsüba tsü nührü bebürü nyüm lile.

⁵ Ama atsingse nührünü thsamehre, ko azikehrü nüsü nührü du kyo nguchire. Ihnü nührü atpa, Israel changjünung.

⁶ I müyurüti mülangjüko tunüo arühnü Ih mümüdhe. Nührü bebürünü Ih mümüdhe ko I adoba mükhyücho, hütsünü Ihnü nührü mükhyüchore ko nührü tsurüti I bebürü müthsasohnung.

⁷ “Nührü bebürü alaa kangli, alaa du Ih nyüm amünyi shitpahre, hütsünü nührü adhichi ashah kangsohnung.

⁸ I müyurü amünyi khu nührü likehre, hütsünü nührünü arüh amünyi alaau shitpahsohnyüre.

⁹ Nührüsü müyurü roh-i du khingchinung! Ihnü nührü khingchinung ko nührü thsamehcho ngang hisohnung.

¹⁰ Nührünü nührü nohlüm mübü tsunung, ta yang du linung. Nührünü amüwa tsingrangti mübünung, ta tsuzarü mülinung, tunüo aparü tsingrang khanglang wünung nührünü I tenü zacho.”

Abüdongba -nü Amünyi Mübüba Mülangjücho

¹¹ Abüdongba-nü yore “Yongkha ahi ko asinü I müyurü lümlong thsangnyangjüre!

¹² Arühnü singchang khüdu te thsayahiya tsingdhingre! Singchang tsünü arühnü müdhenyücho tsü yore! Arühnü Ih pehjüko. Khingkurü khüdu nahtrahnaxenglarü kangcho kyo, arühnü aparü tsingrang khyang khakhuchüjüko.

¹³ Arühnü akhangchah Amüsa müdümla tsü kangmübü jüre, ko akhümki tsü tsa ngucho dunü, arühnü akhangchah tsü singdong athseng pohki axümlichi tahre. “Hütsü khu nührü tsularütinü arüh afü ire, ko nührü tsunyahlarütinü nahtrahnaxengre.

¹⁴ Ta Ihnü hütsü nengdang arüh mükhingchinung, tunüo nührübürü mii amübükuh la nahtranahxenglarü te würe ko arüh yola aparü tsingrang khyang kangmübü jüre. Choyoh yunü yocho kyo, ‘Lümlong müliba nyitsarülü changnung.’

¹⁵ “Nührü Israelrünü Ite yuje müchonye, Judarülü hütsüta tüthsasoh. Gilgal mahkhang Bethaven la tümübü mahkhang hütsüla akang liba Abüdongba nengla tu tünyengcho.

¹⁶ Israelrü tsü nangsheng-kuri kyo hongzile. Zanu yola sanza kyo Ihnü khüta arüh kangnung?

¹⁷ Israelrü tsü adelü kyothrinü müshülipehko. Arüh jangjang thsasohnung.

¹⁸ Yongkha khütang yongpü, ashah rang nahtranahxeng la arühnü künyangre.

¹⁹ Nyübongnü kyo arüh fotsinung, ko apa tsingrang kangmübü shulüm arüh ashah khyünung.